Hacı Zulfiğar Mikayılzadə və çey həmməsləkon muhakimə bə təxir eqıniə

İyuli 24-minə ruji Boku Qonə Cinayəton Məhkəmədə Hacı Zulfiğar Mikayılzadə və çey 11 nəfər həmməsləkon məhkəmə dəvom kardışe. Hakim şohidiku xəbə sedə ki, boci bə məhkəmə omeku imtina kardedəş? Əv cəvob dodə ki, bə məhkəmə ome ro pulım nıbe.

Hakim votedə, əvoym, az ıştı ro puli ədem. Çəyo çeyku xəbə sedə ki, muttəhimonədə kion zınedəş? Şohid votedə ki, hiç kəsi. Az qıley kosibə odəmim. Mınşon məcburən bə polis şebə barde ki, az bəpe şoydiəti bıkom. Çımı de ım odəmon hiç qıley oşnoəti nime! Hacı Zulfiğar bə hakimi votedə ki, çe koyku bixəbər ım odəmi bə məhkəmə boçi vardəyone? Hakim cəvob doe zınedəni. Motijə mandedə. Bə şoydi votedə ki, şe bəzneş. Şoydən bey oqardedə ki, bəs tı votedəbiş çımı ro puli bədoş? Hakim ijən motijə bedə. Haci Zulfiğar, Seyid Elman bey votedən ki, tı çey ro puli doe vəd kardəbe, əvən şıməku ıştə votə  sıxani əməl karde tələb kardedə. De ım curə hesıbesi məhkəmə 20 dəğiğə dəvom kardedə, hakim ey bə təxir eğande məcbue bedə. İclasi barədə ım məlumat "Fasebook"ədə yuzer Bilal Huseyni  təsvir kardəşe. Məhkəmə nubətinə iclas iyuli 28-ədə dəbəvarde.

Taleh Bağırzadə və çey həmməsləkonədə çand kəsi hələən karsədə oqətedən. Vəkil Yalçin İmanovi dəvon vindemon karde piəşe, əmo bımi ro bey imkan doəşon ni. Ey bə "Azadi radio" bı barədə məlumat doəşe, həmən votəşe ki, çimi səbəb ehtimal ki, bəvon işqəncə doədey.

"Milli Şura" sədr Cəmil Həsənliən "Azadlıq. info" saytədə nıvıştedə ki, "məmləkəti ğanuni muhafizə kardəninə orğanon konstitusion nəzarətiku bə kəno beşən, həni bə qıley cinayətə lonə peqardən".