Hisobkardə palata xeyli muəssisonədə maliyyə darıştəyon bə oşko bekardəşe

Az.R -ədə Hisobkardə Palata 2001-minə sori iyuni 12-ədə təsis bıə. Həmonə sori dekabri 7-iku fəaliyyət nişon dodə. Çey vəzifə budcə vəsaiton məsrəfi audit, yəni təftiş kardeye.

Palata ım sornə təftişi nəticon devləti muəsisonədə xeyli maliyyə darıştəyon bə oşko bekardəşe. Jıqo qıley vəziyyət bə meydon beşedə ki, məvotbən məmlkətədə təmiz ko kardə hiç qıley devlətə muəssisə niybən.

Devlətə Sosial Mudafiə fondi Şəki, Lankon, Qəncə şəhər, Suraxani Ğuba və Ağcabədi  rayon şebonədə, Qəncə şəhər Səhiyyə İdarədə, Milli Elmon Akademiya İnformasiya Texnoloqiyon İnstitutədə, Boku Devlətə Universitetədə, Melorasiya və Ovə Təsərrufati Ojə Səhmdar Cəmiyyətədə, İctimai Televiziyadə devləti budcə vəsaiti dələmurd kardə fakton bə oşko beşən. Palata navonə soronədən ım curə maliyyə cinayətə əməlon barədə bə cəmiyyəti məlumat doəşbe. Əmo tosə ısət devləti huğuğ muhafizə orğanon tərəfo bımi jəğo qıley əhəmiyyət doəşon ni. Bəzi eksperton çimi səbəbi parlamenti mustəğil nıbeədə vindedən.

"Azadi Radio" saytən xəbə dodə ki, Maliyyə Vəzarəti ım sori budcəku bo 5 qılə rayoni co bə vəsaiton məsrəfi vəziyyət təftiş kardəşe. Nəticədə 6 qılə budcə təşkilatonədə 1 milyon 763 həzo mənot məbləğədə nırəsəy bə oşko beşə. De təftişi nəticon əlağədar materialon bə Respublika Sər Prokurotura vığandəşone.