Məhkəmə çe şəhrıvandon puli dələmurd kardəkəsış azad karde

Boku Apellyasiya Məhkəmə bə "Altun" istirahətə mərkəzi xıvand, həmən "Badi-kubə" Mənzil İnşaat Kooperativi direktori muavin Asif Əsədullazadə şikayəti diə kardə iclas bə orəx rəsə. "Azadlıq.info" bə "Report" sayti əsasən xəbə dodə ki, de hakim Faiğ Ğasımovi sədrəti dəvardə ım məhkəmə çe Əsədullazadə barədə iminə məhkəmə bekardə hokum ləğv kardəşe. Bey bəraət doəşe.

Geyd karde lozime ki, Asif Əsədullazadə dələdızdiətiədə ittiham bedəbe. Əv çe 29 nəfəri de mənzil hırie məğsədi bey doə 860 həzo mənot məbləğədə puli dələmurd kardeədə ittiham bedəbe.

Bı rujonədə bımi oxşər qıley ğərarən Boku Qonə Cinayəton Məhkəmədə hakim Əfğan Hacıyevi doəşe. "Aztelekom" Məhdud Məsuliyyətinə Cəmiyyəti nafkonə direktor Məhəmməd Məmmədov 4 milyon 500 həzo mənot puli dızdieədə ittiham bedəbe. Məhkəmə əvış bə 5 sor 7 manq 19 ruj muddətinə şərti zindonə cəzo məhkum kardışe. Əv həmonə dəğiğə çe məhkəmə zaliku beşe şe bəştə kə.

Vəkil Fariz Namazli iyuli 25-ədə axır ki, Kurdəxana İstintağ təcridxonədə de Taleh Bağırzadə vindemon karde zınəşe. Məlum bə ki, iyuli 20-minə ruji məhkəmə iclasi mərəşulə bə peştə 5 nəfər - Taleh Bağırzadə, Abbas Huseynov, Əli Nuriyev, Fuad Ğəhrəmanli və  Cahad Babakişizadə bə kars dənoşone. İsət Huseynov və Cabbarov bə Ğobustan sərpuşə zindon, Babakişizadə bə 12 numrəninə  həbsxonə ovoştıniəşone. Qımon heste ki, əmandənə məhbusonən nezə rujonədə bə digər həbsxonon dəvunon.