6-minə Koloniyadə bə məhbuson işqəncə dodən
"Maidə.az" sayt bə "İslamınsesi" istinadən Respublika Penitensiar Xidməti 6-minə Koloniyadə bə məhbuson qonə işqəncon doe barədə məlumaton dərc kardəşe.
Məhbus Tahir Həsənovi bıyə İmrani bə sayti muraciət kardəşe ki, ım problemi bə ictimaiyyəti nəzə bırosno. Çunki, çey bı həxədə bə Respublika muvafiğ təşkilaton nıvıştə muraciəton nəinki xeyrış bedəni, tam əks nəticə dodə. De şikayəti əlağədar omedən həmonə koloniyadə çey bıyə məcbur kardedən ki, şikayətiku imtina ərizə bınıvışto. Əv həniən bə dəhşətinə işqəncon məruz mandedə. Hokuməti rəsmiyon votedən ki, devlət bo har məhbusi oğəte ro manqi 420 mənot pul xarc kardedə. Əmo bə dustəğon doə harde həmişə ov və makarono ibarət bedə. Bə bı həxədə şikayət kardə məhbuson şiddətinə işqəncə dodən. Penitensiar Xidməti mətbat şebə rəis Mehman Sadığovi ım fakton təkzib kardəşe, votəşe ki, əqər tojə fakton barədə şikayəton bıbon, eyən mutləğ təhğiğ bəkarden.
" Bastainfo.com" saytən Boku 1№ -ninə İstintağ Təcridxonədə iyuni 25 -i şəvi nimədə 2 nəfər məhbusi marde barədə nıvıştəşe. Çəvonədə i kəsi ıştənış ehaştə, ə i kəsən dılənoxəşi səbəbiku aspardəşe. Penitensiar Xidmətədə bə sayti muxbiri zanqi cəvob doəkəs bə ni.
"Azadlıq.info" Lankoni sərhədə ləşkəri hərbi hissədə çəvuş Vusal Hummətovi ğəfil marde xəbə pevolo kardəşe. Hərbi həmkaron çey cənazə Qerabboy rayoni Nadirkəndədə bə çey ailə təhvil doəşone, votəşone ki, ey intihar kardəşe. Əmo çey valideynon bəştə i qlə zoə ıştəni kışte bovə kardedənin, votedən ki, əv 2 ruji bə diqə bə məzuniyyət bəpe bəvoy, əvşon kıştə. Mərhumi Haftıımə mərasimi bəpeştə çey nezə odəmon Boku - Ğəzax maqistralə şosse ro pebırniəşone. Mudafiə Vəzarəti de ım intihari əlağədar hiç qıley məlumat doə nişe.
