Hokumət di təsərrufati zəhmətkəşon zəmini çəvon dasto sedə

Bə Əmlokə Məsəlon dair Devlətə Komitə çe 2017-minə sori 6 manqnə statistik məlumaton elan kardəşe. Dionədə zəminon bisəmər istifadə karde səbəbiku 40 həzo hektar zəmini icarə muğavilə ləğv kardəşone, bı barədə 1700 protokol tərtib bıə, icarədaron 1 milyon 200 həzo mənot cərimə bıən.

184 həzo hektar zəmin de kaşteko məğsədi bə diqər huğuği və fiziki şəxson icarə doəşone. Komitə çəvon nomon elan kardedəni. Bəzi mətbu orğanon nıvıştedən ki, həmonə zəminon bə hokuməti nezə odəm və şirkəton doəşone.

Zağatala rayoni Əliabad di sakinon bə "Azadi radio" votəşone ki, 1996-minə sori sovxozon ləğv beədə zəminon bəvon baxş kardışone. Har ailə bı zəminonədə fındığə boğ eğandışe. Bımiro çanədə zəhmət kəşəşe. Isət hokuməti odəmon həmonə zəminon çəvon dasto sedən. Ğeyrəz ımi çe əhali mol çovniə kəfşənonən musadirə kardəşone. Diy əhali bə vitse-prezident Mehriban Əliyeva bı barədə şikayət kardəşone, əmo çeykuən hiç qıley soəx beşəni. Zağatala İcra Hakimiyyəti bə Radio muxbiri votəşe ki, Əliabad di sakinon şikayəti əsas nişe. Əqər çəvon bə ım zəminon iddia hestışonebu, bə məhkəmə muraciət karde bəzınen.

Səlyoni rayoni zəhmətkəşonən bə "Azadi radio" ıştə problemon barədə votəşone ki, rayoni Tədaruk Muəssisə sori əvvələdə dəvon muqavilə dəbastəşe ki, məsələn, kartofi 1 kilo çəvonku bə 60 kopik bəhırie. Isət bə 23 kopiq tədaruk kardedə. Im ğıymətən çəvon moli moyə bekardedəni, əvoni muflis kardedə. Hərçənd ki, Səlyoni vıjorədə kərtofi ibıno məzənnə bə 45 kopiq, kilo-kilo ğıymət bə 60-70 kopiqe. Səlyon rayoni həmonə Tədaruk muəssisə rəsmi numayəndə ım iddaon təkzib kardəşe, votəşe ki, Tovuz rayonədə kartofi ibıno məzənnə bə 28 kopiqe, əmə bə kom səbəb  ey nısənəmon, boəmon Səlyoni kartofi bə 40 kopiq bısənəmon?