Az.R-ədə mustəğilə jurnalistika tale

Boku hokuməti Respublikadə azad jurnalistika tamam bəştə nəzarəti ji dənoe niyyət həni bə cəmiyyəti çok məlume. Prezidenti tərəfo bə jurnaliston həvoyə mənzilon doe bə həmonə siyasəti xidmət kardedə.

Hərçənd ki, devləti Mətbuatə Şura nomədə qıley təsisat hestışe. Çey elan kardə məramnamədə nıvıştə bıə ki, jurnalist ğıymətinə hədiyyə, şinovinə bepulə xidməton bəpe ğəbul nıko. Hokumət i tərəfədə de ım curə əməlon mass-media numayəndon bəştə siyasəti xidmət kardovnidə,  diqər təfəfədə bə azad jurnaliston təzyiğ və təhdidon şe-şe həniən ğıvonin kardedə. Haliyədə jıqo odəmonədə 10 nəfər zindonəde. Sərbəst fəaliyyəti dəvom kardə jurnaliston çe məmuron  ıştəbəsə hərəkəton bə ictimaiyyəti nəzə rosnie cəhdədə beədə, bəvon de har vasitə mane bedən, əvoni şantaj kardedən.

"Azadlıq.info" Abşeroni Hevsan ğəsəbə nezoni "Nemekə xıl" nomimə əraziədə hokuməti tərəfo mevsumi sahibkaron biznes obyekton rıjnie barədə məlumat dərc kardəşe. Sahibkaron votedən ki, bə ım ğeyri-ğanuniə koy çe Prezidenti koməkçi Novruz Məmmədovi nezə odəmon rəhbərəti kardedən. Jurnalist Aytac Əhmədova ım prosesi bə video  kəşeədə naməlum qıley şəxs çey kamera dətır jəşe vitə. Im koədə iştirak kardə polison həmonə dızdi qəte ro hiç cəhd nişon doəşon ni.

Peşo Əhmədova ıştə "Fasebook" səhifədə nıvıştışe ki, az  bə Suraxani Rayoni İcra Hakimiyyət şım. Əyo çımı video kamera bəmı oqordınişone. Əmo fleş - kartşon, ki həmonə hadisə kəşəmbe, onıqordınişone. Çımı kamera dızdiəkəsi, həmən bə İcra Hakimiyyəti dast çı cur eqınie barədə bə çımı parson cəvob nıdoşone.

İm curə, azad mətbuati məhdud kardə siyasət Boku hokuməti bə məmuron ıştənbəsəti həniən rəvoc doe niyyətiku xəbə dodə.