Zindonədə bə Taleh Bağırzadə işqəncə dodən
"Mısılmonon İbemonə Hərəkati" sədr Taleh Bağırzadə və çey 17 nəfər həmməsləkon bə muxtəlif həbsxonon dəro kardəşone. Bə məhkəmə ğərori əsasən əv, Abbas Huseynov və Cabbar Cabbarov ıştə cəzo 7 sori sərpuşə rejiminə zindonədə kəşənine.
Əvonşon iyo vardəcəğin bə karser dənoə. Bə Taleh anədə fiziki cəzo doəşone ki, ısət çey səhhət vey qonə vəziyyətəde. Bı barədə çey əvlodon bə "Azadlıq.info" xəbə doəşone. Vəkil Yalçin İmanovi xeyli vaxte ki, dey vindemon karde ro bə Penitensiar Xidməti muraciət kardəşe. Əmo çəyo hələ ki, hiç qıley cəvob omə ni.
Bə diqər koloniyaon dəro vığandə məhbuson har kəsiku çə muəssison rəhbəriyyəti tərəfo 2000 mənot rışvə tələb kardedən. Əks təğdirədə əvoniən de bə sərpuşə rejiminə Ğobustani zindon vığande şantaj kardedən. "Azadlıq.info" nıvıştedə ki, bəvon tosə avğusti 10-minə ruji mehlət doəşone. Im 15 nəfər məhbusən bə koloniya daxil bəçəğin əvonşon kuə, çəyo bə karser dənoəşone. Votedən ki, dəvon ım curə beinsonə rəftori sifariş çe petono doəşone.
"İslamazəri" saytən çe Devlətə Statistika Komitə qıley məlumat dərc kardəşe. Məlum bedə ki, orəxnə 2 sorədə bə Az.R 3000 tonisən vey xuqə qujd idxal kardəşone. Həmonə qujd çe Braziliya, Kanada, İspaniya, və həniən bəzi Avropa məmləkətonku vardə bıə.
