Taleh Bağırzadə tərəfdaron çe Ğobustani zindoni vədə aksiya dəvuniəşone

Çe "Mısılmonon İbemonə Hərəkati" sədr dini məhbus Taleh Bağırzadə səhhəti barədə bədə xəbə çey həmməslək və tərəfdaronış norohət karde, və əvon avğusti 6-ədə çe Ğobustani ciddi rejiminə zindoni vədə aksiya dəvunişone, çəvrey rəhbəriyyətiku çe Haci Taleh səhhəti barədə məlumat doe tələb kardışone.

Penitensiar Xidməti rəsmiyon ım aksiya iştirakəkon 2 nəfər numayəndə ğəbul kardəşone. Votəşone, icazə bədon ki, Taleh de telefoni deştə nezə odəmi qəp bıjəno, həmən vindemon bıko. Çey jimoni həmro Leyla İsmayılzadə dey qəp jəşe, bı barədə bə Azadi Radio məlumat doəşe ki, " Taleh votışe, şukur bə xıdo har çi normale, bə norohəti ehtiyac ni. Ey demı vindemon karde ıştən nıpişe. Karser cəzo orəxə bəpeşt bəmə xəbə bəkarde, bəvədə bey lozim bə əşyon bəbamon boeyo."

Vəkil Yalçın İmanoviən votışe ki, "de Taleh vindemon karde ro xeyli vaxte, bə Penitensiar Xidməti muraciət kardəme. Çəğono bəmı votedən ki, çımı muraciəti cəvob bə Ğobustan zindoni rəhbəriyyəti vığandəşone.  Əmo çəvrey rəhbəriyyət votedə ki, məktub bəvon rəsəni. De ım vasitə çımı de ıştə muvəkkili vindemon karde bə mışğıl eğandəşone".

Avğusti 7-minə ruji Haci Zulfiğar Mikayılzadə və çey 11 nəfər həmməsləkon məhkəmə nubətinə iclas dəvardə. "Vətən uğrunda" sayt xəbə dodə ki, hakim Zeynal Ağayevi çe  vəkilon xeyli miğdarədə bə nav doə vəsadəton ki, ittihami təkzib karde ro çe mudafiə dastədə etibarinə fakton bə oşko bekarde əzni,  hiç qılə təmin kardəş ni.

Məhkəmə iclas avğusti 14-ədə dəvom bəkarde.