Ğobustani zindonədə bə dindaron dəhşətinə işqəncon dodən

Avğustə manqi 8-minə ruji vəkil Yalçin İmanov nəhayət ki, de Taleh Bağırzadə vindemon karde zınəşe. Hacı Taleh Ğobustani ım ciddi rejiminə zindonədə bə məhbuson dəhşətinə işqəncon doe barədə qəp jəşe. Votəşe ki, "ıjo məhbuson bə carmex dəbaste adi qıley cəzo hisob bedə, ımon bəmə ce "Bandotdel"isən qonə işqəncon dodən. Az çe Abbasi işqəncə doe sədo məsedəbim. Bımi etiraz kardıme. Bı səbəb mınşon  7 sutka bə karser dənoe. Əyo 6 sutka ənəhardə aksiya dəvunime."

Vəkil İmanovi həmonə ruji de məhbus Abbas Huseynoviən vindemonış bıə. Abbasovi, zindoni rəis Aftandil Ağayev, çey muavin və de 4-5 nəfər həmkaron bahəm ey kue və işqəncə doe barədə məlumat doəşe. Votəşe ki, "iyuni 26 -minə ruji həşi sıədə mınşon 3 saat zindoni soədə bə osınə pusnə dəbastışone. Az çəvon ım hərəkəti ğeyri-ğanuni be bə rəism vote, əmo de çey  iştiraki mınşon kue və bə karser şodoşone. Çımı lınqon və daston bə çarmexi dəbastışone, 2 sutka ım vəziyyətədə  karserədə oqətışone."

Vəkili  bə Rakrus TV votəşe ki, çe Abbasi bədənədə xeyli işqəncə rizon hestin. Səhhətədən problemon bə əməl omə. Bı barədə bə Respublika Sər prokuratura şikayət bəkarde.

De ım həvəşiə hərəkəti əlağədar dindaron çe Penitensiar Xidməti bina vədə etirazə aksiya dəvunie piəşone, əmo polison bımi imkan doəşon ni.

Əliyev hokuməti məmuron ım ğədər beğanuniə və beysurə hərəkəton bə Respublika ictimaiyyəti etirazi səbəb bıə. "Milli Şura" sədr Cəmil Həsənli, AXCP sədr Əli Kərimli, huğuğə mudafiəçi Oqtay Quləliyev, muxalifə publisist və jirnaliston çe hokuməti ım bə miyonə əsri məxsus işqəncə metodon Az.R -ədə tətbiğ kardə əməlon məhkum kardəşone.