Kurdəxonə təcridxonədə "lyuks" kamera bo ki təşkil kardəşone

Boku 1 numrəninə istintağə təcridxonə ki, bey həmən" Kurdəxonə təcridxonə" votedən qıley həmkari de anonimə şərti bə "Təzadlar" sayti məktub vığandəşe.

"Azadlıq.info"ən bey istinadən nıvıştedə ki, çəvrey rəis Rəşid Səfərov 2 ruje ki, bə çanq-poçə dəqıniə, təcridxonə personali həmkaron səfərbər kardəşe, bo Respublika Sər Naziri muavin Əli Həsənovi nəvə Nail Allahverdiyevi kameradə "lyuks" şərait soxte məşğule. İm nəvə həmonə Naile ki, çey avtoxuliğanəti bə 2 nəfəri marde, 2 nəfəriən şikəst be səbəb bıə. Im "luks" kameradə bohoninə kondisioner, televizor, yəxçal, mobil telefon, har curə təamon hestin. Bey har ruj ğeyri-məhdud miğdarədə deştə piə har odəmi de telefoni qəp je icazə doəşone. Təcridxona rəis Səfərovi bəştə komanda dəstur doəşe ki, ım çe Əli Həsənovi xahişe ki, çe Nail baləku moğayat bıbon, bə çey xoto nıqınon.

Bəşəri huğuğon mudafiəçi Oqtay Quləliyevi bə "Azadlıq.info" votəşe ki, "Ğobustani zindonədə bə dindarə siyasi məhbuson ğeyri-insoni işqəncə fakton bə Beynəlxalqə Səlibe Sorx Komitə və diqər bəşəri huğuğon mudafiə təşkilaton nəzər rosniəme. Bəvon, həmən bə çəmə həmmilətə ruşinəfikron muraciət kardedəm ki, hokuməti bə ım ğədər həvəşiə, ğəddorə hərəkəton motijə nımandon, ıştə etirazə vanqi barz bıkon".

"Arannews.com" saytən xəbə dodə ki, de Nardarani hadisə əlağədar dəstqir bıə orəxnə 2 nəfər - Elxan İsqəndərov və Əbəlfəz Bunyadovi istintağ bə orəx rəsə. Çəvon məhkəmə 1-minə iclas bə avğusti 17 təyin kardəşone.