İron bo həmsərhəd məmləkəti noxəşinon səhiyyə muəssison bədute

Az.R şəhrıvandon bo mualicə ro kullən bə İron şe məlum qıley fakte. Har sor de ım məğsədi bə İron şəkəson miğdar təğribən 200 həzo nəfərisən vey bedə. "Azadlıq.org" de ım məsələ əlağədar çe məmləkəti odəmon fikir xəbə səşe.

Hostoro rayoni 2 nəfər sakini votəşone ki, İronədə  səhiyyə xidməti səviyyə çe Az.R-sən barze. Xidməti, həmən dəvocati ğıymətən  xeyli erjone. Tibbi ekspert Davud Ğorbanoviən ım fakt təsdiğ kardəşe, votəşe ki, ım problemi tədğiğ karde lozime, hokumət bəpe bımi ciddi fik bıdo ki, Respublika səhiyyə sistemədə mevcud nırəsəyon çe arə bardə bıbo. İğtisadşunas Vidadi Mirzəyeviən etiraf kardəşe ki, Respublikadə səhiyyə infrastruktura de muasirə ovdonon təchiz bən. Əmo buruştinə mutəxəssison kamin. Həmən səhiyyə sistemədə rışvəxorəti dəparçınie lozime. Tibb İnstituti rektor Əmiraslanovi isə Respublika səhiyyə xeyli tarif kardəşe, votəşe ki, Azərbaycanədə jəqo qıley noxəşi ni ki, ey mualicə karde mumkun nıbo.

İroni Sosialə Təminatə Təşkilati de səhiyyə turizmi əlağədar ıştə planon təğdimat mərasim dəvuniəşe. İm planədə 17 qılə mərizxonə bə Azərbaycan və İrağ məmləkətono omə noxəşinon səhiyyə xidmət nişon bədo. Təşkilati sər direktor Təği Nurbəxşi votəşe ki, nezə vaxtonədə Parsabad, Təbriz, Urmiyə və Xoy şəhəronədə çe Az.R-ku omə noxəşinon mualicə karde ro mərizxonəon ıştə fəaliyyəti bino bəkarden.

"Maidə.az" bə "Xəzər Xəbər"i istinadən Yevlax rayoni Ailə Saleməti Mərkəzi tibbi personali bə noxəşini de co rayoni ğeydiyyatədə be vonə tibbi komək nişon doeku imtina karde barədə nıvıştəşe. Rayoni əlağədar təşkilati  bı barədə bə muxbiri parsi cəvob doeku  imtina kardəşe.