Məhkəmə bə Abbas Huseynovi şikayəti diə kardeku imtina kardışe

Ğərədağ rayoni məhkəmə bə dini məhbus "Mısılmonon İbemonə hərəkati" sədri muavin Abbas Huseynovi Ğobustani zindonədə işqəncə doe, dey ğeyri-insoni rəftor karde barədə şikayəti diə kardeku imtina kardəşe. İm xəbə bə Rakrus TV Abbasi vəkil Yalçın İmanovi doəşe. Ey həmən votəşe ki, Ğərədağ rayoni məhkəmə ım ğərariku bə Respublika apellyasiya məhkəmə şikayət vığandəşe.

Abbasi nezə odəmon bə "Azadlıq.info" sayti məlumat doəşone ki, əvon de Penitesiar Xidməti rəhbəriyyəti vindemoni bəpeştə, avğusti 14-ədə  Abbasi de telefoni deştə ailə uzvon qəp jəşe, votəşe ki,çey karantin orəxə, əvşon bə kamera ovoştınə. Bey işqəncə doe bə ictimaiyyəti məlum bıe bəpeştə zindoni həmkaron həni dey beəmonə rəftor kardedənin.

"Mısılmonon İbemonə Hərəkati" fəalon de Səlibe Sorx humanitar təşkilati numayəndon vindemonədə çəvonku xahiş kardəşone ki, bə Abbasi didor bışon, bey işqəncə fakton bə ğeyd bısənon. Im təşkilati odəmon votəşone ki, bımi icazə se ro bə hokuməti  muraciət bəkarden.

Dindaron Huğuğon Mudafiə Komitə zindononədə de bə dini məhbuson işqəncə doe fakton əlağədar iclas dəvuniəşe. Komitə sədr Azərbaycani Ruşinəfikron İbemoni rəhbər Eldəniz Ğuliyev, Revşən Əhmədov və diqər jurnalist və içtimai fəalon hokuməti de məhbuson ım ğədər ğəddorə hərəkəton məhkum, bə jıqo əməlon əleyh vəhdət nişon doe zəruri be ğeyd  kardışone.