Az.R umumidaxili məhsul ımsorən bə kam bedə

Azərbaycani Devlətə Statistika Komitə 2017 -minə sori 6 manqnə iğtisadi inkişafi vəziyyəti dair rəğəmon elan kardəşe. Bı muddətədə məmləkətədə istehsal bıə məhsul bə ponə sori eyni devri nisbətədə 1% bə kam bıə.

"Azadi radio" ğeyd kardedə ki, ponə sori umumdaxili məhsul 3,8%  kam bıe. Komitə həmən elan kardəşe ki, ım 6 manqədə Respublikadə 25 həzo koə vırə ləğv , 174 həzo tojə koə vırə oj  bıə ki, çımonən 119 həzo qılə daimi koə vıronin. Mustəğilə eksperton fikir jıqoe ki, Statistika Komitə, ım rəğəmon bə hokuməti xeyr soxtə kardedə. Əmo orəxnə soronədə məmləkətədə iğtisadiyyati həcmi bə kam be, hətto ım devləti Komitən etiraf kardedə. Jıqo qıley vəziyyətədə Əliyevi hokumət bə xarici məmləkəton iğtisadiyyati sərmayə noə siyasəti dəvom kardedə. Qurcistoni Statistika İdarə dəvardə sorədə bə keşvər daxil bıə investisiyon barədə rəsmi məlumat elan kardəşe. Məlum bıə ki, Az.R ponə sori de 558 milyon dollari bə Qurcistani ən vey sərmayə noə devlətebən. İmən bə Qurciston həmonə sori omə cəmi sərmayə 35,6 % - i təşkil kardedə.

Respublika İğtisadiyyati həcmi sorbəsor bə kam be səbəbiku budcədə bə əməl omə nırəsəy pur karde ro MM bə Verqi Məcəllə əvəz və əlavon kardəşe. Verqi Vəzarəti rəsmi numayəndə bə "Modern.az" sayti parsi cəvobədə votəşe ki, çimi bə peşt de fərdi zəhməti məşğul bəkəson - derzi, fotoqraf, saatsaz, dayə, pinəçion har manq 5 mənotiku tosə 30 mənoti sabit verqi avjor kardənin bəben.

Az.R iğtisadiyyati 67 % çe ğeyri-ğanuniə istehsali nəzarətədə, yəni bə budcə verqi avjor nıkardə muəssison nəzarətədey. Jıqo qıley devləti ıştə budcə nırəsəy bə sodə şəhrıvandon zəhməti hisob pur karde cəhdon çey hokuməti çe monopoliston dastədə çanədə ociz mande nişon dodə.