Boku hokumət bə azad mass-media orəx beşedə

Çe Verqi Vəzarəti Verqiə Cinayəton Təhğiğatə Departementi bə "Turan" İnformasiya Aqentiyyəti aid cinayətə ko bino kardəşe. Ey 37 həzo mənot verqi avjor nıkardeədə taxsikor zınedə. Avğusti 16-ədə ım Vəzarəti həmkaron Aqenyiyyəti ofisədə orəxnə 3 sornə maliyyə sənədon və muhasibi komputer peqətəşone.

"Turan"i rəhbəriyyət ım ittihami təkzib kardedə, bə Boku İğtisadə Məhkəmə de iddia ərizə muraciət kardəşe.

Aqentiyəti direktor Mehman Əliyevi bə Rakrus TV votəşe ki, "Departamenti mayə manqədə əmə 5 həzo mənot cərimə kardəşbe və ğeyri-ğanuni həmonə məbləğ çəmə hisobo peqətəşbe. Əmə çəvon ım ıştənbəsə hərəkətiku şikayət kardımone, məlum be ki, çəmə verqiə ğarz nimonebən. Ə pul bə dumo oqordıniemone. Isət ım Departamenti bə çəmə muəssisə əleyh cinayətə ko bino karde çəvon ğərəzkarəti nışonəy.

Bə "Turan" aqentiyyəti jıqo təzyiğ və ğərəzinə munasibət bə ictimaiyyəti etirazi səbəb bıə. Azərbaycani Siyasi Muhaciron Hərəkati, Musavat partiya Respublikadə bə azad mətbuati ım munasibət məhkum kardəşone. Sulh və Demokratiya İnstituti direktor Leyla Yunusi bəyon kardəşe ki, ısət Respublikadə muxalif mətbuat həni mandə ni. Orəxnə mustəğilə  rujnomə "Azadlıq"  ponə sori dəbastışone. "Turan" məmləkətədə yekanə mustəğilə media orqan bıe, isət eyən dəbaste pidəşone.

Azadi Radio çe "Human Rights House Foundation" beynəlxalqə təşkilati Az.R -ədə mustəğilə KİV -on bə repressiya məruz mande barədə bəyanat bə cəmiyyəti nəzə rosniəşe. Im fondi direktor Maria Dahle votəşe ki, mustəğilə mass-media har qıley cəmiyyəti de korrupsiya mubarizədə muhumə vasitey. Boku hokuməti bə "Turan"i verqi avjor nıkarde ittiham, çəvon ıştəni korrupsiya əməlon və maliyyə vəsaiton bə ofşor ovoştınie muğayisədə vey beədalətinə və ğərəzkarə hərəkəte.