Beynəlxalqə Səlibe Sorxi numayəndon de Abbas Huseynovi didor kardəşone

Bə Nardarani hadison məhbus Abbas Huseynovi Ğobustani zindonədə ğeyri-insoni işqəncə doə əməlon Az.R cəmiyyətədə bə hokuməti ım beysurə əməlon hiddət bə əməl vardışe.

Bı rujonədə Respublika Ombudsmeni numayəndon de Abbasi vindemon kardəşone. Çimi ərəfədə zindoni rəhbəriyyəti Abbasış çe karsero bekardə, kamera və karantinə otağ təmir kardəşe, bə divoon ranq jəşe. Bə çey tan tojə olət tan kardəşe. Abbasi bə Ombudsman Aparati numayəndon bey doə işqəncon barədə qəp jəşe, həmonə işqəncə rizon nişon doəşe. Penitensiar Xidməti şebə rəisən de Abbasi didor kardəşe çey şikayəton məsəşe. Avğusti 15-ədə Beynəlxalqə Səlibe Sorxi  Boku təşkilati həmkarən çey tono omə, dey molağatış kardə, çey bədənədə işqəncə rizonış vində. 2 ruji bə diqə Abbasi vəkil Yalçın İmanoviən dey vindemon kardəşe, ım məlimaton çeyku məsəşe və bı barədə bə "Azadi radio" qəp jəşe.

"Maidə.az" bə "İslamın səsi" sayti istinadən xəbə dodə ki, Ğobustani zindonədə de muxtəlifə vonəon bə AİP sədr Mevsum Səmədovi çe kəyku vığandə ərzağ və baxşon rosnieku imtina kardedən. Vəkil Yalşın İmanovi deyən didor kardəşe, Səmədovi bey zindonədə ovi problemi barədə qəp jəşe, votəşe ki, ovi har ruj cəmi 1-2 saat dodən ki, ımən tovıstoni bı curə qamə vaxtədə məhbuson ovi təminatədə problemon bə əməl vardedə.

Satirik şair Tofiq Həsənliən zindonədə bə işqəncə məruz mandə. Çey vəkil Elçin Sadığovi bə Meydan TV votəşe ki, de ım məsələ əlağədar avğuati 14 -ədə məhkəmə proses bino bənin bıe. Əmo əv bə təxir eğandəşone. Şair Həsənli 2015-minə sori avğusti 12-ku zindonəde. Məhkəmə əvış bə 6 sor zindonə cəzo məhkum kardə.