Hokumət əhali cərimə karde ro bo vonə nəvedə

Budcə nırəsəyon pur karde ro Boku hokuməti cərimon miğdar və məbləğ xeyli ziyod kardəşe. Milli Məclisi deputaton məzuniyyəti ərəfədə orəxnə muzakironən bı məsələ həsr kardəşonbe. Isət Roy Polis har ruj 5 həzoku tosə 8 həzo şoferi cərimə kardedə. Əmo bı rujonədə məlum be ki, hokuməti dıl demiən sərin bedəni.

Meydan TV bə "Sputnik" sayti əsasən qıley xəbə pevolo kardışe. Respublika Devlətə Roy Polisə İdarə şebə rəis Kamran Əliyevi bəyon kardəşe ki, ıştə maşinisə "həvatedəm" sıxani nıvıştə şoferon cərimə bəben. Im ğaydə darıştə sıravi şəxson 50 mənot, vəzifədaron tosə 200 mənoti, huğuği şəxson isə tosə 2000 mənoti cərimə avjor kardənin bəben. Çunki Parlamenti ğəbul kardə tojə ğanunədə ım reklam hisob bedə. Əmo avtomobili məxsus bıə şirkəti nom və loqo numayiş karde reklam hisob bedəni. Çe Roy Polisi ım məsul şəxsi votəyku jıqo məlum bedə ki, ıştə avto səpe havate barədə 1 kəlimə nıvışte po bəpe bə DKV muraciət bıke, bə devləti rusumə pul avjor kardə bəpeştə bımi ro pasport peqəti, cəyo de ğələmi 1 kəlimə sıxan  nıvıştə koğəzi bə maşini şişə səpe dəcoknie ixtiyarədə bəbeş. 

Im, eksperton tərəfo bə muzakirə və qıvoninə tənğidon səbəb bıe. "Musavat.com"iən xəbə doşe ki, bəs Kamran Əliyevi im sıxanon təkzib kardəşe, votəşe ki, əv məzuniyyətəde, məmləkəto xaricəde. Çe ım cərimə qəponku xəbə nişe. "Reklami həxədə ğanun"i tələbon bə maşinxıvandi ıştə maşini həvatə elani aid karde nibəbe.

Boku şəhəri Devlətə Roy Polisi de ictimaiyyəti əlağə şebə rəis Vağif Əsədov isə bə "Axar.az" sayti votəşe ki, maşini səpe həvate barədə nıvıştəyon çe şoferon diğğəti dəgijnie bəzıne, bı səbəbən bə jıqo elanon əleyh təbliğat barde lozime ki, maşinxıvandon  ıştə avtomobilon şişəsə jəqo nıvəştəyon dənıçoknon.

Cimi sori bə nav hokuməti bə şoferon ıştə maşinonədə bə şıə imomon dair nıvıştəy və şəkilon dəçoknieyən ğədəğən kardəşbe.