Boku şəhəri əğılə bağçəonədə rışvəxorəti

Bə Az.R ğanunon muvafiğ respublikadə məktəbəğədər tərbiyə muəssison bə devləti hisob fəaliyyət nişon dodən. Yəni bə əhali bepul xidmət kardəninin. Respublikadə ısət 3400 jıqo əğılə bağçə fəaliyyətəde. Imonən məmləkəti bağçə sınninə əğılon cəmi 17% - i əhatə kardedə.

Bənə Qax, Qədəbəq, Daşkəsən rayoni jıqo əğılon cəmi 1% de  bağçə əhatə bedə. Əğılə bağçəon əksəriyyət paytaxt Bokuədə məskune, əmo əvon əhali tələbi tam əhatə karde zınedəni. Imən bey səbəb bedə ki, valideynon ıştə əğılon berışvə bə bağçə noe imkaniku məhrum bedən.

"Lent.az" de ım problemi əlağədar valideynon arədə parseş dəvuniəşe. Respondenton əksər hissə devləti bağçəonən bənə şəxsi bağçəon de pulibeku şikayət kardəşone. Votəşone ki, devləti bağçə mudiron de "vırə ni" vonə berışvə əğılon bə bağçə peqətedənin. Çəvon "təxs" çe 200 mənotiku tosə 700 mənot təşkil kardedə. Har manqən 20 mənotiku tosə 60 mənot əlavə pul doe məcbur bedən. Har idə mərasimonən bo valideynon bə 100 mənot bə sə omedə. Əvon bə Boku İçra Hakimiyyəti çanədə şikayət kardəşone, əmo ımi hiç qıley nəticəş bə ni. Im bağçonədə xidməti səviyyən bərbad vəziyyətəde. Əğılon rə-rə noxəş qınidən.

Boku Şəhəri Məktəbəğədər Təhsilə Muəssisəon İdarə ki, bə əğılə bağçəon fəaliyyəti məsule, bə sayti telefonə zanqon cəvob doə nişe.

Bə təhsili dair ekspert Kamran Əsədovi votəşe ki, əğılə bağçəon bə Təhsil vəzarəti ne, bəştə rayoni İcra Hakimiyyəti muvafiğ şebə tabeye. İm əğılə muəssisonədə rəhbəriyyət və kadron təyin karde həmən çe koyku bekarde, bə çəvon koy nəzarət çe hokuməti ım strukturi səlahiyyətəde.  Bə səbəbən ım muəssisonədə de təlim-tərbiyə və təhsili muvafiğ nıbə ım curə hərəkəton intişar kardəşe.