"Turan" İA direktor Mehman Əliyev dəstqir kardışone

Boku şəhəri Yasamal rayoni məhkəmə "Turan" İnformasiya Aqentiyyəti direktor Mehman Əliyev tosə noyabri 7-i bə 3 manq muddət dəstqir karde barədə ğəror doşe. Bə cey munasibətədə cinayətə ko bino bıə. Hokumət ey de verqi avjor nıkarde, ıştə vəzifəku sui-istifadə və ğeyri-ğanuniə biznes fəaliyyəti ittiham kardedə. Çe Boku ım hərəkət çey beynəlxalq aləmədə bərbod bıə imic həniən xərob kardışe.

Avropa Şura Sər katib Torborn Yaqlandi, ASPA Media Azadi və Jurnaliston Əmniyyəti təşkilati direktor Vladimir Ariev, Fransa Xarici Koon Vəzarəti de ım hadisə əlağədar bəyanaton doşone, Az.R hokumət dəvət kardışone ki, bə Avropa Şura, həmən Bəşəri huğuğon norma və prinsipon ki, ğol kəşəşe, bəvon əməl karde bəştə ehdə peqətəşe, bəvon riayət bıko.

"Besərhədə Reportyoron" təşkilati rəsmi Yohann Bihr votəşe ki, M.Əliyevi dəstqir karde səbəb əv bıə ki, hokuməti əvış deştə bə həmkarəti  məcbur karde zınəni.

"Jurnaliston Mudafiə" Komitə Cənubi Ğəfğaz məntəğə koordinator Nina Oqnianova bə "Amerika sədo" votəşe ki, bə Mehman Əliyevi munasibətədə ım ittihami siyasi səbəbış heste. Azərbaycanədə çimi bə navən bə azad mətbuati və bə jurnaliston repressiv hərəkəton bən. Im əməlon Azərbaycanış çe Avrasiya reqioni ən senzura bə repressiyaninə məmləkət peqordəniə.

Reportyoron Azadi və Əmniyyəti İnstituti Boku hokumətiku Mehman Əliyev, həmən 18 nəfər jurnalist, bloqqer, şair, ədib, qraffiti fəalon bedune şərt azad karde tələb kardəşe.

"Turan" İA kollektivi de ım curə vəziyyəti əlağədar sentyabri 1-ku ıştə fəaliyyəti tosə ğeyri - muəyyənə vaxti oğəte məcburiyyətədə mande elan kardəşe.

Aqentiyyəti bənqi hisobşonən dəbastə.