Boku Apellyasiya Məhkəmən çe Abbas Huseynovi işqəncə şikayət rədd kardışe
Məlume ki, Nardarani hadisə məhbus, "Mısılmonon İbemonə Hərəkati" sədri muavin bə Abbas Huseynovi Ğobustani zindonədə dəhşətinə işqəncə doəşonbe, əv ce zindoni koəkon və rəhbəriyyəti tərəfo bə ğeyri-insonə rəftori məruz mandəbe.
Çey vəkil Yalçın İmanov ım məsələ bə ictimaiyyəti nəzə rosnişe və bə Ğərədağ rayoni məhkəmə şikayət kardışe. Əmo məhkəmə ım şikayəti bə icraat penıqətışe. Avğusti 24-minə ruji Boku Apellyasiya Məhkəmə vəkil Yalcın İmamovi şikayəti dair iclas dəvunişe, Ğərədağ rayoni məhkəmə ğəror təsdiğ, demiən bə Abbas Huseynovi iqəncə doe barədə şikayət rədd kardışe. Vəkil İmanovi bə Azadi radio votəşe ki, Respublika məhkəmə instansiyon bə Huseynovi şikayəti diə kardeku imtina kardışone. İsət əmə ım koy bə Avropa Məhkəmə bəvğandemon.
Respublika Penitensiar Xidməti çe Yalçın İmanovi barədə bə Vəkilon Kolleqiya muraciət vığandəşe. İmanovi bə Abbas Huseynovi işqəncə doə əməlon bə cəmiyyəti nəzə rosnie qorə çeyku şikayət kardəşe. Vəkili ım xəbə bə "Azadlıq.info" rosniəşe, votəşe ki, çe Vəkilon Kolleqiyaku ım şikayəti həxədə bey zanqşon kardə, məlumat doəşone.
Demiən jıqo qıley ziddiyyətinə vəziyyət bə meydon beşedə; Penetisiar Xidmət işqəncə fakton bilavasitə təsdığ kardedə, əmo Respublika məhkəmon, ombudsman, bə insonə huğuğon mudafiə dair ğeyri-hokumətə təşkilaton ım ğeyri-ğanuniə əməlon təhğiğ kardeku bə kəno mandedən. Isət umu i qılə bə Avropa Məhkəmə mandə. Vəkilon Kolleqiyan bə Yalçın İmanovi mustəğilə hərəkəti orəx doe ro, yəğin ki, ey çe Kolliqiya üzviətiku xaric bəkarde ki, ım bo diqər vəkilon ibrət bıbo.
