Silahə amboədə tıpemon

Avğusti 27-minə ruji Xızı rayoni qıley hərbi hissə silahə amboədə otəşsuzi bə tıpemonə səbəb bıe. Tıpə mərmion bə ətpof dion eqınie nəticədə Quləziədə 2, Şurabad məntəğədə 1 qılə kə sute, Xızı və Siyəzən rayoni bəzi ərazionədən otəşsuzi bə əməl ome.

Respublika Roy Polis idarə Boku - Ğuba avtomaqistralə ro dəbaste məcburiyyətədə mande. "Sputnik Azərbaycan" sayti həmonə zona muxbiri xəbə doşe ki, Fevğəladə Halon Vəzarət ətrofi Şurabad, Quləzi, Sitəlçay, Yaşma məntəğon əhali təxliyyə kardəışe. Səhiyyə Vəzarəti mətbuat xidməti məlumat doşe ki, ım hadisə nəticədə 6 nəfər zəxmin bıə.

Prezident Əliyev de ım ğəzo əlağədar devləti muvafiğ təşkilaton səlahiyyətinə vəzifədaronədə ibarət komissiya təşkil karde barədə dəstur doşe. Respublika Hərbi Prokuraturan cinayətə ko oj, istintağ-əməliyyatə tədbiron bino kardəşe.

Ponə sori iyulə manqi 27-ədən Mudafiə Sənaye Vəzarəti Şirvan şəhəri silahə zavodədə jıqo qıley tıpemoni nəticədə 2 nəfər tələf, 20 nəfər zəxmin bıəbe. Çey sori bə navən həmonə Vəzarəti zavodədə jəqo qıley tıpemon bə əməl oməbe.  Bəvədən Prezidenti Xususiə Komissya onışe, və Sər Prokurotura Qonə Cinayəton İstintağə İdarə cinayətə ko bino kardışe. Çə 2-minə hadisəku 13 manq dəvardə, əmo həmonə təşkilaton bardə təhğiğati barədə hiç qıley soəx ni.  Cəmiyyətədə jıqo qıley təəssurat bə əməl omə ki, hokumət ım ğəzaon səbəbon bə oşko bekarde və əvoni çe arə barde əvəzi, de çəvon eparçınie məşğule. İmən ayəndə vaxtonədə jıqo hadison təkrarən bə əməl omə ehtimali həniən vey kardedə.