Boku Apellyasiya Məhkəmən Əbulfəzləbbasi nom ğədəğən kardışe

İyuli 25-ədə çe Taleh Bağırzadə fərzəndi 1 sınn təmom be. Valideynon çey nomi Əbulfəzlabbas noe səbəbiku Boku hokuməti rəsmi idarə, yəni Yasamal Rayoni Ğeydiyyatə Şebə çey ım nomi təsdiğiku imtina kardedə və bey təvəlludə şəhadətnamə dodəni.

Vonə vardedə ki, Azərbaycani Elmon Akademiya Terminoloqiya Komissiya vıjniə nomon siyahiədə Əbulfəzlabbasi nom ni. Bə səbəbən ım nomi bə əğıli noe nibəbe. Talehi jimonə həmro Leyla İsmayılzadə bə məhkəmə şikayət kardışe,  məhkəmən jıqo qıley əcaibə ğəror bekardışe ki, "Əbulfəzlabbas nomi tələffuz bə əğıli mənafe məğbil nıbe qorə ey bə hırdənon noe əbıni."

Bı rujonədə Boku Apellyasiya Məhkəmə bə Leyla xanımi şikayəti diə kardəşe, navonə məhkəmə ım əcaibə ğəror ğuvvədə oqətəşe. Vəkil Yalçin İmanovi bə Azadi Radio votəşe ki, çe ım ğərariku bə Respublika Ali Məhkəmə kassasiya şikayəti bədo.

Azərbaycani Milliə Elmon Akademiya Terminoloqiya Komissya sədri muavin Sayəli Sadığova bə "Modern.az" sayti votəşe ki, orəxnə vaxtonədə valideynon bəştə əğılon çəvon komissiya tərtib kardə siyahiədə nıbə nomon noəşone. Bənə İşılay, Aylin, Betul, Dəfnə, Binurə, Tuqan nomon çe valideynon təfəkkuri məhsule. Im proses mutərəqqie, cunki çəmə milləti bəştə tırkə mənşə oqardə prosesi nişon dodə.

Hokuməti ım rəsmi odəmi votəyədə jıqo beşedə ki, bə əğılon bənə Dəniz, Dəmir, Yağmur, Damla befərə nom noe məğbule, əmo  çəmə dini-mənəvi simvol bənə Əbulfəzləbbasi tarixi şəxsiyyəti nomi bə əğılon noe ğeyri-məğbule.

Boku məhkəmon ım ğəraron hokuməti Az.R xalqi ıştə dini mənəviyyatiku diəro karde roy bə manqurt peqordıniə siyasət barde i kərən bə oşko bekardışe.