Bə dini məhbuson şikayəti Avropa Bəşəri Huğuğon Məhkəmə diə bəkarde
Vəkil Cavad Cavadlı bə "Azadlıq.org" sayti məlumat doəşe ki, sentyabri 3-ədə Avropa Bəşəri Huğuğon Məhkəmə dini məhbuson - Zulfiğar Mikayılzadə, Elman Ağazadə və Cavid Məmmədovi şikayəton əlağədar de Az. R hokuməti kommunikasiya bino bəkarde.
Mikayılzadə və Ağazadə de Nardarani hadisə əlağədar dəstqir kardəşone. Əvon bə Avropa Mənkəmə bə səbəb şikayət vığandəşone ki, Boku rejimi istintağə orğanon tosə məhkəmə bino be çand bəjəm çəvon huğuğon darıştəşone. Məmmədov isə 2012-minə sori de şər maddə bə zindon dənoəşonbe. Əv çe rejimiku boştə bəraət tələb kardedə.
Az.R -ədə Vahid Siyasi Məhbuson Siyahi hozo kardə Qrup məmləkətədə siyasi məhbuson tojə siyahi bə dınyo ictimaiyyati elan kardəşe. Həmonə siyahiədə 160 nəfəri nom heste. Çəvonədə 97 nəfər dini fəal, 19 nəfər kutləvi etirazonədə iştirakəkə, 10 nəfər jurnalist, 11 nəfər siyasi fəal, 2 nəfər ədib, 2 nəfər sabiğ devlətə məmur, 2 nəfər tosə umri axıri bə zindonə cəzo məhkum bıə məhbus, 1 nəfər huğuğə mudafiəçi, 3 nəfər çe siyasi muhaciron əvlodon ki, devləti əvon qirov peqətəşe, 10 nəfərən Səid Dadaşbəyli dastə odəmonin ki, əvonən de dini fəaliyyəti ittihami məhkum kardəşone.
Im Qrup ğeyd kardedə ki, Boku hokumət ıştə repressiya siyasəti ısətən dəvom kardedə, çimiku dast nıkəşə niyyəti oj-oşko nişon dodə.
