Hokumət iğtisadiyyati həmə sahon bə monopoliya ji dənodə

Orəxnə vaxtonədə Bokuədə taksi xidməti bə vahid idarə sistemi tabe karde barədə xəbon nəvedən. Imi de taksiə xidməti məşğul bıə şirkət və fərdi şəxson xeyli norohət kardəşe.

De ım məsələ əlağədar Boku Nəğliyyatə Aqentiyyəti mətbuatə xidmətiku bə "BakuPost" sayti cəvob doəşone ki, çəvon muəssisə bə sərnişinon xidməti həniən çok karde ro tədbiron hozo kardəşe. Haliyədə Bokuədə 15 həzo fiziki və huğuği şəxs de taksi xidməti məşğule. Əmo paytaxti əhali de ım xidməti təmin karde ro 8 həzo taksi vəs kardedə. Bə səbəbən bə taksi miğdari kvota tətbiğ bəkardemon.

Boku Nəğliyyatə Aqentiyyəti numayəndə votəyon bə sodə zıvon peqordınəmon, məlum bəbe ki, paytaxti taksi xidmət bə i qılə mərkəzi tabe bəkarden, yəni ım xidməti sahə bə inhisar bəsen, de taksi xidməti məşğul bıə 7 həzo odəmi ım koyku bə kəno şobədon.

Hokumət ıştə ım monopolist siyasəti di təsərrufatədən dəvom kardedə. "Azadlıq.info" Fizuli və Laçıni didərqininə əhali zəminon çəvon dastonku se həxədə nıvıştəşe. Əvon bə Azadi Radio votəşone ki, İcra Hakimiyyəti məmuron polison vığandəşone, 34 qılə fermerə ailə 800 hektar zəmini çəvon dasto sedən. Çimi muğabilədə bəvon çəvon kəşə zəhmətisən 5-6 kərə kam məbləğədə kompensasiya təklif kardedən.

Fuzuli Rayoni İcra hakimiyyəti numayəndə etiraf kardəşe ki, həmonə zəminonədə aqropark eğande nəzərədə qətə bedə.  Bə çəvon zəminon kompensasiyan dodəmon, əmo əvon rozi bedənin, cand ğat ziyod məbləğ tələb kardedən.