Boku İslamə Universitetədə təhsili səviyyə

Bokuədə İslamə Universitet heste. Əv 1991-minə soriku sıftə Boku İslamə Mədrəsə bazə əsasədə fəaliyyət nişon dodəbe. Sori bədiqə bey Universitet status doşone, 1994-minə sori Ədliyyə Vəzarəti ım status rəsmən təsdığ kardışe. Çə vaxtnəku ım muəssisə bo məmləkəti dini mutəxəssison hozo kardedə. Bakalavrə təhsili muddət 4, maqistrə təhsil isə 2 sore.

"Modern.az" sayti ım dini muəssisə məzunon təhsili səviyyə barədə bə Dini Təşkilaton dair Devlətə Komitə sədri muavin Qunduz İsmayılovi tənğidi fikron həxədə məğalə dərc kardəşe. İsmayılovi de ım problemi əlağədar "Azərbaycanədə dini məsələ" nomədə qıley kitob nıvıştəşe. Əv votedə ki, bə BİU ğəbul be ro  çe respublika  diqər təhsilə muəssison arədə ən jinə miğdarədə - çəmi 100 bal tələb bedə. Çimi nəticən bey vardə bekardedə ki, miyonə təhsilə məktəbi kamzəndinə abituriyenton bə ım Universitet ğəbul bedən. İmən çey məzunon cəmiyyətədə bənə intellektual dini xadimon perəse imkani xeyli bə kam kardedə.

İsmayılovi ğeyd kardəşe ki, ım tələbəon əsas məğsəd  bə ali dini təhsili dair diplom bə dast vardeye. Məmləkəti daxilədə xarico omə dini təbliğaton vəy se zəruri bə vaxtədə çəmə ıştən hozo kardə kadron kafi ğədər elmi potensial nişone. Cəmiyyət əvoni bənə səvodinə mutəxəssison ğəbul kardedəni, bə xaricədə təhsil sə dini xadimon bovə və ehtiram hələən barzə səviyyəde.