Boku hokuməti korrupsiya əməlon barədə Avropa Parlamentədə votemonon

Əliyevi hokuməti korrupsiya əməlon dınyo mass-media diğğət mərkəzəde. "Azadlıq.info" Avropa Parlamentədə de ım mərəşulə əlağədar votemonon barədə nıvıştəşe.

İm Parlamenti ən yolə fraksiyonədə qıley- Sosialiston və Demokraton qrupi təklif kardəşe ki, dınyo həmə nifuzinə media orğanon muzakirə kardə ım fakton barədə bəpe Avropa Parlamentən hartərəfinə təhğiğat bıbardo. Fraksiya sədri muavin Jippi Kofod votəşe ki, "Avropa cəmiyyət çe Azərbaycani korrupsiya əməlonədə iştirak kardə bank və siyasətmədaronku hesabat tələb bə çəşe.  Çəmə fraksiya çe Avropa Parlamentikuən bə ım məsələ dair rəsmi munasibət tələb kardedə.

Jiqo məğamədə "The Washington Post" rujnomə Az.R-ədə azad mətbuati bə bevəcə ruj mande, Əliyevi de azad fikirinə odəmon bənə tirani rəftor karde dair məğalə dərc kardəşe. Prezidenti  bə ictimai-siyasi məsəlon dair koməkçi Əli Həsənovi de ımi əlağədar votəşe ki, ım rujnomə bə Azərbaycani əleyh həmişə ğərəzinə mevğeyədə bıə. Duəvojəti, fakton təhrif karde çey informasiya siyasəti məxsusi cəhətonəde.

İlham Əliyevi bə xarici siyasət məsəlon dair koməkçi Novruz Məmmədovi bəyon kardəşe ki, çe Azərbaycani firəvanə jimoni  bədxahə ğıvvon çəş peqətedəni. Əvon pəxiləti səbəbiku bə çəmə devləti beynəlxalğə imici zərbə je, ey çe nufuzo eğande pidəşone. Bənə Sorosi odəmon, ım çırkinə kompaniya peştədə mandedən və bə jıqo bədnamə təşkilaton maliyyə dodən.

Muxalifəri lideron isə votedən ki, hokuməti numayəndon bə Avropa cəmiyyəti votəyon de vay-şivəni cəvob doe əvəzi çok əbi ki, Respublika Sər Prokuratura ım korrupsiya fakton barədə cinayətə ko bino bəke, de ım fakton əlağədar odəmon bə istintağ cəlb bəke. Bəvədə cəvon ım vay-şivənon qaspu qıley effektış bəbi.