Boku dionədə peşomə ovi problem

Boku ətrofi dion de peşomə ovi təşhizatədə hələən xeyli problemon hestin. Bə xeyli məntəğon ovi de fasilon dodən. Bənə Quzdək, Mehdiabad, Binə, Zığ, Hevsan məntəğon əhali ovi de avtomobili kırnie məcbur bedən. Əvon 1 çən ovi bə 20 mənot hıridən.

 "Azadlıq.info" de ım problemi əlağədar çe "Azərsu" Ojə Səhmdarə Cəmiyyəti de ictimaiyyati əlağə şebə mudir Anar Cəbrayilli sıxanon bə əhandon rosniəşe. Cəbrayilli votəşe ki, Boku ətrofi dion əksəriyyət de peşomə ovi tam təmin kardə bıə. Əmo Diqoh, Nardaran, Sulutəpə, Hukməli və çand qılə co dionədə sakinon ovi de maşinon kırnie məcburiyyətədə mandən. Bə ım dionən ovə xətton okşrniə layihon dəvom bəkardemon.

"Maidə.az" Minqəçevir şəhəri didərqinon jimon kardə mikrorayoni əhali de peşomə ovi təminatədə problimon bə cəmiyyəti nəzə rosniəşe. 10 qılə nəvmərtəbə bina ki, əyo 500 didərqinə ailə jidə, de ovi təminat xeyli vaxte ki, bərbad vəziyyətəde. Bə mənzilon daima lırdinə ov dodən. Xeyzonon məcbur bedən ki, ey sətij bıkon. "Azərsu" həmonə vəzifədari ım problem jıqo izah kardəşe ki, Minqəçevir şəhərədə tojə ovə təchizatə şəbəkə bə istifadə doəşone, əmo ım həmonə mikrorayoni əhatə kardedəni. Bəvrə çe kanə şəbəkəku ov doə bedə. Bə səbəbən əyo ım problem heste. Tosə ımsori orəxi həmonə mikrorayoni ım problemi həll bəkardemon.