Pars Today

Ğərbi siyasi daironədə nişon doə təzyiğ və sanksiya ehtimali məqəvuji İ. Əliyevış məcbur kardə ki, bəzi kompromis hərəkəton bıkə. Dəvardə rujonədə Sabunçi rayoni məhkəmə Nardarani hadisə məhbusonədə 4 nəfərşən çəvon cəzo muddət onırəxə azad kardışe. Çimi bə navən dini məhbusonədə 14 nəfər azad kardəşonbe.

Boku Apellyasiya Məhkəmən AXCP fəal Faiğ Əmirli  3 sor 3 manqnə zindonə cəzo de şərti cəzo əvəz kardışe və ey azad karde barədə ğəror doşe.

Vırəş heste ki, bıvotım, Masəlu rayoni dini məhbusonədə Surac Ağayev ıştə 5 sornə zindonə cəzo kəşə bəpeşt bə azadi beşə. "İslamazəri" sayt nıvıştedə ki, 2012-minə sori hokuməti Masalu rayoni 8 nəfər dindar dəstqir, əvonış 4 sor 6 manqiku tosə 8 sor muddəti məhkum kardəbe. Çəvonədə 5 nəfər hələən zindonədən.

Bəzi dini və siyasi məhbuson azad karde, hiçən Boku hokuməti sərt siyasəti bə humanistəti tərəf əvəz be nişon dodəni.  Ğobustoni zindonədə bo Nardarani hadisə məhbus, Mısılmonon İbemonə Hərəkati sədri muavin Abbas Huseyni jimoni təhdidon hestin. Ey bı barədə de telefoni bəştə nezə odəmi xəbə doəşe, votəşe ki, har ruj ey de bə karser dənoe, hətto kışte təhdid kardedən.

Vəkil Yalçin İmanovən xəbə dodə ki, Nardarani məhbusonədə 3 nəfər ki, 7 numrəninə zindonədə bedən, çəvon nom bə "fərar karde meylinə məhbuson" ğism daxil kardəşone ki, əvon bəruj saat 8 - ku tosə şanqo saat 10-y bəpe har saatədə 1 kərə bə muvafiğ jurnali ğol bıkəşon. Hərçənd ki, zindonon daxili ğanunədə ım çurə ğaydə ni, yəni zindoni rəhbəriyyəti im hərəkət ğeyri-şanunie. Penitensiar xidməti bə demi əlağədar parsi  cəvob doə nişe.