Əliyev hokuməti tojə natə muğavilə dəbastışe

Sentyabri 14-ədə Boku hokuməti, həmən Azərbaycani devlətə Natə Şirkəti, yəni SOKAR-i de Azəri, Çırağ və Qunəşli mədənonədə nat bekardə şirkəton tojə muğavilə imza kardışe.

İm curə muğavilə 1994-minə sori bə 30 sor muddəti, yəni tosə 2024 -minə sori de BP , "Chevron", "Statoil", "Exxonmobil" TP və diqər natbekardə şirkəton dəbastəşonbe. Bo ım muğavilə muddəti orəxe hələ 7 sor mandə İlham Əliyevi bı curə qəm şodoe bə siyasi və iğtisadi təhlilqəron muxtəlifə fikron səbəb bıe. "Haqqin.az" sayt hokuməti rəsmi izahati bə əhandon rosnidə. Əvən çımədə ibarəte ki, Azərbayçanədə nati hasilat orəxnə soronədə saru eğınedəbe. Çimi vəy se, hasilati ziyod karde ro bə əlavə investisiyon ehtiyac hestbe. Iştə həmkar şirkəton bımi cəlb karde ro 1994-minə sori muğavilə de tojə şərton və əlavon tosə 2050-minə sori dıroz karde zərurət bə meydon beşe.

Im 3 qılə mədəni nığılə ğatonədə mandə 550 milyon ton nati bekarde ro əlavə 40 milyard dollar vəsait tələb bedə. Çimi 35% BP, 25 %-i isə SOKAR noənine. İm muğavilə bo Boku hokuməti ım rujnə xeyr ıme ki, əv təcili ğaydədə 3 milyard 600 milyon dollar bonus bəse. Peşo, 10 sori muddətədə ey obəqordıne. "Azadlıq.info" çe tədğiğatşunas- jurnalist Xədicə İsmayili fikri bə əhandon təğdim kardedə. Əv votedə ki, bo Boku hokuməti ıçətnə maliyyə behrani vəziyyətədə ım ğədər bonus bo nəfəs kəşe ro bənə həvo vacibe. Hokumət həmən çəş kardedə ki, ım muğavilə təsdiğ bıə bəpeşt Ğərbi bey siyasi təzyiğ və tələbon bə kam bəbe. Əmo ım umu əbəse. Beynəlxalğə mass-mediya Əliev hokuməti korrupsiya əməlon təhğiğati bə orəx rosnie ro əzm nişon bədo. 

Az.R Parlament ım muğavilə təsdiğ kardənie.