Avropa Şura Parlament Assambleya "Nardarani hadisə" koy tədğiğ bəkarde

Çe AŞPA Monitorinqə komitə bə Az.R dair həmməruzəçion Stefan Şennaç və Sezar Florin Preda Azərbaycanədə rəsmi səfərədən, de devləti rəsmiyon, deputaton, şəhrıvandə cəmiyyəti uzvon və jurnaliston vindemonon dəvunidən. Prezident İlham Əliyeviən əvonış ğəbul kardə.

Stefan Şennaçi bə BBC Azərbaycani musahibədə votəşe ki, "orəxnə 2 sorədə bə Azərbaycan 6 kərə səfər kardəmone. Im səfəron barədə hesabaton bə Avropa Şura doəmone. Bə Boku hokuməti məsləhət zınəmone ki, məmləkətədə ədliyyə sistemi mustəğiləti təmin bıko, zindodonədə bə məhbuson huğuğon riayət bıbo. Avropa Şuradə bə Azərbaycani dair muzakiron iminə nubədə bo çıvrey xalqi rifahi ro vey əhəmiyyətış heste. Navko hokumət çəmə de siyasi məhbuson vindemoni imkan dodənıbe. Isət bımi hiç qıley maneə ni. İmkanmon heste ki, "Nardarani koy" tədğiğ bıkəmon. Bəmə jıqo omedə ki, Azərbaycani hokumət de Avropa təşkilaton həmkarəti vacib be bə sə dəşedə. Əmə pidəmone bə Avropa şura uzv bıə har qıley devlət bə çey prinsip və muqavilon əməl bıko. Həmən Avropa Bəşəri Huğuğon Məhkəmə ğəraron bə vırə bırosno. Azərbaycanən bənə Avropa Şura uzvi bəpe ıştə ehdədarion icra bıko. Çəmə vəzifə həmən de məhbuson bədə rəftor və bəvon işqəncə doə hərəkəton əleyh mubarizə bardeye.

Avropa Şura çe bəşəri huğuğon, ğanunon və demokratiya iğamətqahe. Əv həmişə bəştə prinsipon sadiğ, həmən təmiz bəmande".