Tojə dərsə sori problemon

Sentyabri 15-minə ruji Az.R-ədə tojə dərsə sor bino bıe. "Azadlıq.info" xəbə dodə ki, ımsor 164 945 nəfər hırdən bə iminə sinif bəşe, Respublika umumtəhsil məktəbonədə handə şaqirdon umumi miğdar isə 1 milyon 455 həzo nəfəre.

Iştə hırdənon bə məktəb vığande bo valideynon  bə əlavə xarci səbəb bedə. 1 qılə əğıli bə məktəb vığande bə 150-200 mənot bəsə omedə. Bo manqi 200-300 mənot məvacib sə odəmi ım vey yolə məsrəfe. Məktəb ləvazimaton ğıymətən bə ponə sori nisbətədə 20-25% ziyod bıə.

"Korrupsiya.az" sayt nıvıştedə ki,  Respublikadə məktəbə parton hozo kardə şirkəti məhsulon bə standarti muvafiğ nıbe nəticədə bo şagirdon səhhəti xəto, bəvonku bənə kifoz və skaliozə noxəşion inkişafi ro şərait bə əməl vardedə. Bə ım curə ğeyri-standartə parton hozo kardə muəssison nəzarət kardə təşkilaton, yəğin ki, korrupsiya səbəbiku ıştə vəzifə deni bə vırə rosnidənin.

Orəxnə soronədə nəşr bıə dərsə kitobon elmi səviyyən xeyli bərbad vəziyyətəde. "A24.az" sayt bı problemi dair çe Respublika Zəhmətdarə muəllim Almaz Həsrəti və bioloqiya elmon doktor, professor Məcnun Babayevi tənğidi fikron bə əhandon nəzə rosniəşe. Əvon votəşone ki, kurrikulum tətbiğ kardə bəpeşt nəşr bıə xeyli dərsəkitobon de elmi səhvon purin. Məsələn, X sinifi "Bioloqiya" kitob ki, 120 səhifədə ibarəte, 30 səhifədə bə elmiə səhvon ro doə bıə. 8 və 9-minə sinifi kitobonədən vəziyyət ım cure. Həsrəti həmən votəşe ki, muəllimon de ım məsələ əlağədar bə vitse-prezident Mehriban Əliyeva de ojə məktubi muraciət vığandəşone.

Təhsil Vəzarəti bə sayti bı barədə parson hiç qıley cəvob doəş ni.