Polisi Azərbaycani İslamə Partiya 25-minə sorəqardışə tədbiri dəvunie imkan nıdoşe

Boku polisi bə AİP ıştə 25-minə sorəqardışi ğeyd karde inkan doəş ni. Partiya fəalon ım tədbir Boku kafeon qıleyədə dəvunie nəzərədə qətəşonbe. Tədbiri bino bıə ərəfədə polis ğıvvon omən odəmon de zuy çe kafe ətrofiku diəro kardəşone.

Iştə ım hoziə, həmən ğeyri-ğanuniə hərəkət jıqo izah kardəşone ki, quya bəvon xəbə rəsə ki, kafeədə bə ovi zəhər umjən kardəşone, bə səbəb ey dəbaste lozime. "Maidə.az" bə "İslamınsesi" istinadən xəbə dodə ki, polison bə mass-madia numayəndonən təzyiğ nişon doəşone, əvonşon təhğir kardə.

Partiya sədri əvəz Haci İlham Əliyevi votəşe ki, polisi ım ğeyri-ğanuniə hərəkət hokuməti elan kardə de "İslamə həmrayəti sor"i vəhdət təşkil kardedəni.

De Nardarani faciə əlağədar dəstqir bıə Haci Zulfiğar Mikayılzadə və çey 11 nəfər həmməsləkon məhkəmə bə orəx rəsedə. Prokurori hakimiku Zulfiğari bə 18 sor, Ruzi İsmayılovi 16 sor, Elman Ağazadə, Faiğ Allahverdiyev, Mehman Ğuliyev, Ramil Seyfullayev, Mubariz İbrahimov, Cabir Əliyevi har kəsi  bə 15 sor, Əli Huseynov, Mehman Məmmədov, Eldar Bunyadov və Elxan Həsənovi har kəsi bə 14 sor zindonə cəzo məhkum karde piəşe. Məhkəmə nubəti iclas sentyabri 25-ədə dəvardənine.

Sentyabri 18-ədə çe "Azadlıq" qəzeti əyalətə muxbir Elçin İsmayılli muhakimə bə orəx rəsə. Şəki rayoni Qonə Cinayəton Məhkəmə əvış bə 9 sor muddəti zinonə cəzo məhkum kardə. Çey vəkil Elçin Sadığovi bə "Azadlıq.info" sayti votəşe ki, məhkəmədə jurnalisti de İsmayıllı rayoni icra sərdari sifarişi dəstqir karde isbat bıe. Əmo hakimi çəmə vardə subuton bə nəzər nısəşe. Çey bekardə hokmiku bə Apellyasiya Məhkəmə şikayət bəkardemon.