Minqəçevir Devlətə Universitetədə hicab ğədəğən kardəşone
"Arannews" bə Rakrus TV istinadən xəbə dodə ki, Minqəçevir Devlətə Universiteti rektor Akif Haçıyevi bə tələbon de hicabi bə universitet ome ğədəğən kardəşe. İm xəbə bə "avropa.info"sayti həmonə təhsilə muəssisə tələbon vığandəşone.
Valideynon rektori ım ıştənbəsə hərəkətiku bə Təhsil Vəzarəti şikayət kardəşone. Vəzarəti rəsmi odəmi bəvon votəşe ki, ım məsələ çe həmonə universuteti daxili probleme, vəzarət bə çey koy mudaxilə karde nibəzne.
Sayti muxbiri bə Təhsil Vəzarəti və bə həmonə universiteti zanq kardəşe, əmo bə çey zanqon cəvob doəşon ni.
Azərbaycani İslamə Partiya bəştə 25-minə sorəqardışə mərasimi dəvunie icazə nıdoe aid mətbuatə konfrans dəvuniəşe. "İslamazəri.com" sayt xəbə dodə ki, Partiya sədri əvəz Hacı İlham Əliyevi votəşe ki, AİP ım 25 sori dırozi məmləkətədə bə insonon vəhdət və həmrayəti xoto, həmən dini mənəviyyati hifz kardə siyasət bardəşe. Bəmə çanədə zülm və təzyiğon bıboən, əmə ıştə əğidəku əqardınimon, çimi bə peştən ıştə ım roy dəvom bəkardemon. Azərbaycani Ruşinəfikron İbemoni sədr Eldəniz Ğuliyevi, AİP Zənənon Şura sədr Nevrəstə İbrahimova, dini fəal Akif Heydərli və həniən diqər natiğon de ım sorəqardışi munasibəti bə partiya uzvon və məmləkti həmə mısılmonon təbrik votışəne, hokuməti Partiya fəaliyyəti məhdud kardə əməlon məhkum kardışone.
