Pars Today

AŞPA numayəndə Stefan Şennaki bə "Amerika sədo" radio votəşbe ki, əvon sentyabri 16-ədə Ğobustani zindonədə de Taleh Bağırzadə, Abbas Huseyn və həniən de diqər 3 nəfər məhbusi vindemon kardəşone. "Azadlıq.info" saytən ım xəbə pevolo kardəşbe. İsət ım sayt xəbə dodə ki, vəkil Yalçın İmanov sentyabri 22-ədə de Taleh və Abbasi didorış dəvuniə, məlum bıə ki, Avropa numayəndon dəvon vindemon kardəşon ni.

Demiən jıqo qıley ehtimal bə meydon beşedə ki, Ğobustani mudiriyyəti Avropa numayəndon bə dast dənoəşe, yəğin ki, de Taleh və Abbasi nomi bəvon co məhbuson təğdim kardəşe.

"Nur-az.com" bə "İslamınsesi" istinadən nıvıştedə ki, Minqəçevir Devlətə Universitetədə hicabi ğədəğən karde fakt Universiteti mətbuatə xidməti və rektor Akif Hacıyevi təsdiğ kardəşone, votəşone ki, bə ım muəssisə nizamnamə 2.3-minə bəndi əsasən rişinə və hicabinə tələbon  bə təhsil muəssisə daxil bıe ğədəğəne.

Saytən izah kardedə ki, ım təhsilə muəssisə Elmi Şura uzvon jıqo nizamnamə ğəbul kardeədə çok əbi ki, Az.R Konstitusiya i kərən bəhandin. Bəvədə əznin ki, ım ğədəğən, bə devləti Ali ğanuni 48- minə maddə 1-nə bəndi və 42-minə maddə 2-minə bəndi zidde. De ım ğədəğə əvon çe tələbon vicdonə azadiə və təhsil se huğuğon darıştedən. 

"Publika.az" sayti sentyabri 28, 29, 30-minə rujonədə Boku şəhəri muxtəlif iaşə muəssisonədə pivə festivali dəvunie barədə bəştə əhandon xəbə rosniəşe. Bə festival oməkəson həmən muxtəlif nevədə çəxıron çaşe təklif bəkarden. Devləti səviyyədə elan bıə "İslamə həmrayəti sor"ədə jıqo bə islamə mənəviyyati ziddə hərəkəton təbliğ karde bə dıdimə siyasəti dəlalət kardedə.