Az.R hokumət bə dini və siyasi fəalon repressiya hərəkəton dəvom kardedə

Az.R hokumət Məhərrəmə manqədə çe əhali dini fəaliyyəti vəy se ro ıştə repressiya, şantaj və təhdidə hərəkətonku dast kəşedəni. "Press-az.com" sayt hokuməti tərəfo Lankonədə bə əzadariəti məclison noə ğədəğə və şiə fəalon dəstqir karde həxədə məlumat doəşe.

Im repressiv hərəkəton bə qıley hədd rəsə ki, ıştə oləti səpe "Ya Huseyn" nıvışte səbəbiku çand nəfər cıvon polison tərəfo dəstqir kardə bıə. Kəonədə təkiyə mərasimon təşkil kardəkəsonən bə zindon dənodən.

"Maidə.az" bə "İslamınsesi" sayti əsasən xəbə dodə ki, Naxcıvanədə bə Aşura əzadarə məclison əleyh ım Respublika rəhbəriyyəti təzyiğon dəvom hestışe. Haxçıvan şəhərədə, Təzəkənd, Nehrəm, Culfa məntəğonədə əzadarə məçlisi fəalonədə 10 nəfər polison tərəfo dəstqir kardəşone. Haxçıvani mominon məlumat doəşone ki, co məntəğonədən vəziyyət ım ğədər qıvonine. 

Boku hokuməti bə siyasi fəalon təzyiğ və şantajonən dəvom kardedə. Çe 23 sentyabr mitinği ərəfədə respublika muxtəlif məntəğonədə muxalif əhvolinə  62 nəfər siyasi fəal bə polis şebə bardəşone bəvon mitinği təbliğ, əyo iştirak nıkarde barədə çəşnavi doəşone. Çəvonədə xeyli ğism 51 mənotiku tosə 200 mənot cərimə kardəşone,  7 nəfər  bə 10 - 15 sutka muddəti bə zindon dənoəşone.

Sentyabri 25-ədə Hacı Zulfiğar Mikayılzadə və çey 11 nəfər həmməsləkon məhkəmə içlasədə vəkilon votemon kardəşone. Əvon məhkəmə prosesədə ıştə mudafiə kardə məhbuson tamam beqıno bıe subut be səbəbiku bəvon bəraət hukmi bekarde məhkəməku xahiş kardəşone. Prokurori isə əvoni bə 14 soriku tosə 18 sori zindonə cəzo məhkum karde pidəşe.

Məhkəmə ayəndə iclas bə oktyabri 2-minə ruj təyin bıə.