Az.R ərteşədə 9 manqədə 48 nəfər tələf bıə

"Xəzər" Hərbi Tədğiğaton İnstitut nominə Ğeyri Hokumətə Təşkilati bə Az.R Əmniyyət və Mudafiə orğanon dair muşahidon nəticə elan kardəşe. Məlum bıə ki, ımsori dəvardə 9 manqədə devləti ım vəsilonədə 48 nəfər hərbi xidmətkar tələf bıə. Çəvonədə 24 nəfər sərbaz, 2 nəfər qizir, 8 nəfər isə zabit bıə. 17 nəfər Ğərəboği canqədə bə qolulə qıniən, 31 nəfər isə ğeyri-canqə səbəbiku ıştə jimon qin kardəşe.

Im 31 nəfəriədə 5 kəsi intihar kardəşe, 4 nəfər noxəşi, 7 nəfər ğəzo, 4 nəfər ıştə həmro ğandə qolulə nəticədə tələf bıən. 10 nəfəri marde səbəb məlum bə ni.

İm 10 nəfərədə 1 kəs yəğin ki, Kurdəmir rayoni Şıxımlı diy sakin, sərbaz Asif Kərimov bıə. Əv ımsor yanvari 6-ədə bə hərbi xidmət dəvət bıə, sentyabri 7-ədə hərbi qospitalədə vəfatış kardə. Çey moə Validə Kərimova bə "Meydan TV" votəşe ki, çey zoə hərbi hissədə kue nəticədə mardə. Ey bı barədə bə Mudafiə Vəziri,  Vitse-prezidenti, bə Prezidenti şikayət vığandəşe, Mudafiə Vəziri muavini ğəbulədə bıə, əmo çımon nəticəşon bıə ni.

Şəmkir rayoni hərbiə prokuraturadə bı barədə cinayətə ko bino kardəşone. Sərbaz Arif Kərimovi kue barədə çey 3 nəfər sərbazə həmro bə istintağ cəlb bıə. "Meydan TV" bə ım cinayəti təhğiğ kardə  Hərbi Prokuratura mustəntiği zanq kardəşe. Əmo ey bə muxbiri votəşe ki, istintaği dəvom karde səbəbiku bı koy dair hələ məlumat doe nibəbe.