Qəncə şəhərədə Aşura mərasimi iştirakəkonədə 30 nəfər dəstqir kardəşone

Məlume ki, sentyabri 30-minə ruji de Qəncə şəhəri sərdar Elmar Vəliyevi dəsturi şəhəri məçiton dəbastəşonbe. Bı səbəbən əhali Tasua və Aşura əzadadarə məclison dəvunie ro bə İmomzodə ziyarətqah oməbin. Əyo polison muğavimət sındıniəşonbe, və de yolə əzəməti ım əzadadarə məclisonədə iştirak kardəşonbe.

"Azadlıq.info" sayt Aşura məclisi orəxə bəpeşt Qəncə polisi 30 nəfərisən vey şəhrıvand dəstqir karde həxədə xəbə pevolo kardəşe. Şəhəri Prokuroturadə bə çəvon əleyh cinayətə ko bino bıə. Nardarani faciə məhbuson məhkəmə onırəxə, məqəvuji, Əliyevi hokumət bə Aşura əzadarəti məhbuson muhakimə bino karde fikir dəqıniə. 2 həftə çimi bə nav ey Nardarani hadisə məhbusonədə 18 nəfər azad kardışe, ısət 30 nəfər Aşura məhbuson bə çəvon vırə bə zindon dənoe pidəşe.

Az.R -ədə ımsornə Aşura əzadərəti har sornəsən izdihamin dəvarde  devləti rəsmiyon norohət kardəşe. MM deputat Zahid Oruci de ım məsələ əlağədar parlamenti plenar iclasədə votəşe ki, ısət Aşura mərasəimədə iştirak kardə hırdənono ayəndə soronədə bə Suriya şə kamikadzeon pebərəsen. Məclisi spiker Oğtay Əsədovən ım məsələ barədə norohətə fikiron votəşe.

Əmo devləti ım rəsmiyon çe adi şəhrıvandonsən xeyli çok zınedən ki, çe Azərbaycano bə Suriya şə şəhrıvandon ım respublikadə fəaliyyət nişon doə vəhhabi təşkilati perosniə odəmonın. Im təşkilaton məhz çe devləti bəzi vəsilon və səlahiyyətinə məmuron tərəfo himayə, həmən maliyyə dastəq sedəbin. İm devlətə vəsilə və məmuron məmləkətədə şiə mənsubiyyəti şe arə barde ro bə vəhhabi, həmən bə nurçiə cərəyanon pərvərış doe, bımi ro çəvon xarici himayədaronku de milyon dollaron rışvə seyən bə Zahid Oruci, və çey tisbirədə bıə devlətə rəsmiyon çok məlume. Əqər əvon bo terrorçiə kamikadzeon mənbə nəveədə sıftə bəştə lınqi bıni nəzər səğandon, ım mənəbə vırəy səhih muəyyən karde bəznen. Bəvədə qaspu bə Əhil-Beyt (ə) məktəbi ıştə şər ğandə əməlonku omandon.