Vəkilon bo Nardarani hadisə məhbuson bəraət tələb kardışone
Oktyabrə manqi 2-minə ruji Boku Qonə Cinayəton Məhkəmədə Zulfiğar Mikayılov, Elman Ağayev və həniən 10 nəfər Nardarani hadisə məhbuson muhakimə dəvom kardəşe.
Məhbus Faiğ Allahverdiyev, Ruzi İsmayılov və Ramil Seyfullayevi vəkilon votemon kardəşone. Çəvon munasibətədə hiç qıley ittihami subut nıbe səbəbiku vəkilon bo əvon bəraət piəşone. Vəkil Şəhla Humbətova votəşe ki, 9 manq dəvom kardə məhkəmə içlasonədə ittihami tərəf hiç qıley subut bə miyon noe nıznışe. De kom əsas və subuti əvon ım dindaron terrorizmə, devlətə peqırdımonə cəhdədə ittiham kardedən? Bımi dair ittiham tərəfi dastədə hic qıley subut nıbe-nıbe, bı beqınoə odəmon tosə 16 sori zindonə cəzo tələb karde absurd qıley hərəkəte.
Humbətova həmən Mısılmonon İbemonə Hərəkati çe prokurori tərəfo bənə mutəşəkkilə cinayətkarə dastə təğdim kardeyən beəsas və besubutə ittiham hisob kardəşe, votəşe ki, ım Hərəkat bə həmə demokrtik normon muvafiğ bənə ğeyri-hokumətə təşkilati onoəşone. Konfrans dəvunəşe, leqalə idarə heyətış bıə. Im təşkilati Nizamnamə əsas məğsədonədə qıley Azərbaycani cəmiyyətədə azad fikri, demokratiya, mənəvi və əxlaği molyəton təbliğ kardeye. Məqər ıçtə məmləkəti əxlağin, demokratik bıe təbliğ karde cinayəte?
Vəkilon məhkəmədə ıştə mudafiə kardə məhbuson ittihami hiç qıley subut nıbe səbəbiku bəvon bəraət doe çe hakimiku xahiş kardəşone.
