Dini fəal Əhsən Nuruzadə 3-minə kərə dızdiəşone

Mısılmonon İbemonə Hərəkati Əhsən Nuruzadə nomədə qıley uzv hestışe. Əv de Nardarani hadisə əlağədar məhkəmonədə mutəmadi iştirak kardedə və bı barədə bə ictimaiyyəti məlumaton rosnidə.

Çey ım fəaliyyəti səbəbiku polison yanvari 24-ədə əvşon dızdiəbe. 1 həftə muddətədə çe tale barədə bə çey ailə hiç qıley məlumat doəşon nıbe. Bə devləti ali vəsilon, beynəlxalq təşkilaton, bə Səlibe Sorxi muraciəton, və əvon bı koy umjən be nəticədə nəhayət bə oşko beşəbe ki, Nuruzadə çe "Bandotdeli" polison dızdiəşonebən. Jıqo hadisə sentyabri 19-ədə sənibəton təkrar bıe. Polison əvşon ijən dızdie. 3 ruji bədiqə çey vırə,  və məhkəmə ey bə 10 sutkəninə zindonə cəzo məhkum karde məlum bıe.

Oktyabrə mangi 6-minə ruji Əhsən Nuruzadə de Nardarani hadisə əlağədar məhkəmədə iştirak karde məğsədi çe keyku dəro qıniədə kuçədə mulki odəmon əv bə siyo "Çip" markaninə maşin eğətəşone bardəşone. Ailə uzvon bə çey telefoni kardə zanqon cəvob doəkəs bıə ni. Əvon bı barədə bə Azadi radio xəbə doəşone.

Əhsən Nuruzadə oktyabri 2-ədə 10 sutkə zindonədə hıtə bəpeşt çəyo beşəbe. Polison əv quya muğavimət nişon doe səbəbiku dəstqir karde bəyon kardəşonbe. Nuruzadə ımoni tamam du hisob kardedəbe, votedəbe ki, bə polison muğavimət nişon doəş ni. Hətto "Bandotdel"i həmkaron bı idarədə çey telefon dasto səşone, tosə ısət bey oqırdıniəşon ni. Ey ım sıxanon sentyabri 28-ədə Boku Apellyasiya Məhkəmədə votəşbe.  Bəvədə ım məhkəmən çe "Bandotdel"i hərəkəton bəqəm kardəşbe, çe Nuruzadə şikayət təmin kardəş nıbe. "Azadlıq.org" sayti  ım xəbədə polison tərəfo Əhsəni telefoni bey oqırdınie barədə məlumat doənişe.