Hokumət bə siyasi fəalon təzyiği dəvom kardedə

Az.R -ədə muxalifəti dəvuniə mitinğon hokuməti bə siyasi fəalon təzyiğ həniən qıvonin kardəşe. Hələ 23 sentyabr mitinği ərəfədə çe AXCP 62 nəfər uzv bə polis şebə bardəşonbe, çəvonədə bə çand kəsi inzibati zindonə cəzo və cərimə bıriəşonbe, koyku beğandəşonbe.

Qktyabri 7-minə ruji mitinği ərəfədən polisi ıştə həmonə hərəkət təkrar kardışe. "Azadlıq.info" xəbə dodə ki, Boku və rayononədə çe muxalifəti 79 nəfər fəal bə polis bardəşone, bə mitinğ nışe barədə bəvon çəşnavi doəşone, çəvonədə bə 6 nəfəri 10 sutkəku tosə 30 sutkə zindonə cəzo bıriəşone, 5 nəfər çe koyku bekardəşone. Vəkil Əsabəli Mustafayev de həmonə 6 nəfəri təçridxonədə vindemon kardəşe. Məlum bıə ki, polisi əvon de soxtə "ictimai vıronədə dıjmonə qəpon je" ittihami dəstqir kardəşe. Təcridxonədə əvoni qıvoninə şəraitədə oqətedən, kəyku bo əvon vardə xorəki ğəbul kardedənin. Çəvonədə Fuzuli Huseynovi ənəhardə aksiya elan kardəşe. 

Siyasi fəal, Mısılmonon İbemonə Hərəkati uzv Əhsən Nurullazadə ki, ortyabrə manqi 6-ədə polison 3-minə kərə dızdiəşonbe, vəkil Yalşın İmanovi bə "Azadlıq.info" votəşe ki, əv bı səfən çe "Bandotdel"i həmkaron tərəfo dəstqir kardə bıə. Bə çey əleyh de "kulli miğdarədə narkotik həvate" maddə cinayətə ko bino kardəşone. De ım maddə əv de 5 soriku tosə 12 sori zindonə cəzo təhdid bedə. Isət Nurullazadə Kurdəxonə zindonədey. Polisi  bə çey ailə bı barədə tosə ısət hiç qıley məlumat doəş ni.

Nuruzadə ım ittihami rədd kardedə. Ey bə vəkili votəşe ki, sentyabri 19-ədə ey dəstqir kardeədə "Bandotdel"ədə bey ehandışone ki, "əqər əv ıştə ağıli bəştə sə qırd nıko, nubəti səfə bey inzibati cəzo ne, dırozmuddətinə zindonə cəzo bəbırien"