Boku hokumət de ğeyri -rəsmi kokardəkəson mubarizə bəbarde

Prezident İlham Əliyevi Respublikadə ğeyri-rəsmiə məşğuliyyəti vəy se ro tədbirə planon barədə sərəncom imza kardəşe. Ey ım koy icra bə Kokardə Munasibəton Səhmoni və Koordinasiya dair Komissiya aspardəşe. Im Komissiya har 6 manqədə ım sərəncomi icra barədə bə Prezidenti məlumat doənine.

Təhlilqəron fikir jıqoe ki, Prezidenti jıqo sərəncom doədə məğsəd bə budcə əlavə pul vəsaiton cəlb karde, de ım roy budcə nırəsəy çe arə bardeye. Imən məlume ki, Az.R iğtisadiyyati 3 hissədə 2 hissə bə ğeyri-leqalə iğtisadiyyati mənsube. Yəni har sor məmləkəti Umumdaxili Məhsuli 66% çe devlətə budcəku kənoədə mandedə, bey verqi avjor kardedəni, de ım roy devlətə budcə har sor 40 milyard mənot vəsaiti qin kardedə. Məsələn, Respublikadə bə Verqi Vəzarəti reestr daxil nıbə, yəni bey verqi avjor nıkardə xeyli muəssisə və şirkəton fəaliyyət hestışone. Ponə sori "Azadlıq.info" ıştə səhifədə çəvon siyahi dərc kardışe. Əmo tosə ısət nə Verqi Vəzarət, nəən diqər əlağədar təşkilaton bə ım məsələ reaksiya nıdoşone.

Əlbəttə ki, əqər prezidenti ım sərəncomi həmonə muəssisə və şirkəron  bə verqi cəlb karde, çəvon  həmonə 40 milyard mənoti bə budcə avjor karde məğsəd hestışebu, jəqo ımi məmləkəti çe iğtisadi və maliyyə behraniku bekarde roədə bedune şərt muhummə rol bəbeşe. Ne, əqər ım de kosibkorəti məşğul bıə, de ım roy ıştə xeyzoni quzərani təşkil kardə beçizə odəmon bə verqi cəlb karde ro devləti muvafiğə orğanon bə ım kosibon əleyh səfərbər karde nəzərədə qətedəbu, jəqo ım sərəncom məmləkətədə iştisadi behrani həniən nığıl, əhali quzərani tikiən qıbonin bəkarde.