Nardarani hadisə məhbuson məhkəmə dəvom kardəşe
Oktyabri 13-minə ruji Mısılmonon İbemonə Hərəkati sədri muavin Elçin Ğasımov və çey 11 nəfər həmməsləkon məhkəmə dəvom kardəşe. Bəhruz Almədətov nomədə qıley şohid bə məhkəmə vardəşone. Ey votəşe ki, muttəhimonədə hiç kəsi zınedəni. Məlum bıə ki, ittiham tərəfi çe şohid Bəhruz Səmədovi əvəzi səhvən ım Bəhruz bə məhkəmə vığandəşe.
Bı məhkəmə iclasədə co şohidon ifadə doəşone . Umumən 10 manqe ki, ım proses dəvom kardedə, ıyo 55 nəfər şohidi ifadə doəşe, 4 nəfər şohidi məhkəmədə iştirak nıkarde səbəbiku çəvon ifadə elan kardəşone. Oktyabri 27-ədə məhkəmə dəvom bəkarde.
Oktyabri 16-ədə Hacı Zulfuğar Mikayılzadə, Seyid Elman Ağayev və həniən 10 nəfər de Nardarani hadisə əlağədar dəstqir bıə dini məhbuson muhakimə dəvom kardəşe. "Vətən uğrunda" sayt bə Meydan TV istinadən xəbə dodə ki, bı iclasədə vəkilon votemon kardəşone. Muttəhim Mehman Ğuliyev və Əli Huseynovi vəkil Zibeydə Sadığova votəşe ki, Nardarani hadisəsə təğribən 1 manq bəpeştə Mehman Ğuliyev dəstqir kardəşone və çey kədən silah peydo kardəşone. Hərçənd ki, Nardarani faciə bəpeştə əqər cey kədə silah bıəbe, ey ıştə keyku diəro karde əzni. Əli Huseynovi zoəkuən bəştə pıə əleyh ifadə səşone, ımən bə Konstitusiya zidd qıley əməle. Çe Hacı Zulfiğari vəkil Rustəm Zulfiğaroviən votəşe ki, bəzi şahidonku bə Mikayılzadə əleyh ifadon de işqəncə vasitə səşone. Bı məhkəmədə muttəhimon hiç qılə qıno subut nıbe. Bı səbəbən bəvon bəraət bəpe doə bıbo.
Məhkəmə dəvom bə oktyabri 23-minə ruj təyin kardəşone.
