Az.R-ədə bankon əhali çı ğür bə dast dənodən

Bə "Exo" rujnomə "Azərbaycanədə bankon çe əmanətçion puli çokne dələmurd kardedən?" suali ekspert Əkrəm Həsənov cəvob dodə ki, məmləkəti bankon muflis bıe əsas səbəb subyektiv xarakterine. Əksər bankon meneceron bəştə nezə odəmon nom de minimum faizi kredit peqətəşone, dələmurd kardəşone.

Im nırəsəy bə əhali de yolə faizi kredit doe roy pur kardedəbin. Çanədə ki, mənot devalvasiya bənıbe, əhali ıştə krediton vaxtədə oqırdınie imkanədəbe, çəvon ım dızdi səpe oj bedənıbe. Çoko ki, mənoti məzənnə 2 kərəsən vey erjon bıe, əhali krediton oqırdınie imkanonku məhrum bin, banki meneceron dələdızdəti bə oşko beşe.

Əmo Respublikadə hələ muflis nıbə bankon ısətən ıştə dızdə pulon bə kreditoron hisob bərpo kardə siyasət bardedən. "Aztoday.az" sayt jurnalist Rafiğ Cəlilovi bə  jıqo qıley maxinasiya dair tədğiğatə məğalə dərc kardəşe. Im tədğiğati nəticədə məlum bıə ki, "Bank of Baku" ıştə qıley mıştəri 953 mənot  krediti manqə məbləği avjor 3 həftə bə di dəşande səbəbiku çey səpe 400 mənot peniya əlavə kardəşe. Tikiən vaxt dəvardə bəpeşt de məhkəmə ğərari Banki cey ğarz bə 1921 mənot rosniəşe. Im mıştəriən, məvotbən, ıştə huğuği dərəsə odəmonədəybən. Bə məhkəmə de əks -iddia muraciət kardedə. Im məhkəmədə bə oşko  beşedə ki, "Bank of Baku" məvotbən, çe ıştə ım kreditoriku 750 mənotən əlavə dələmurd karde nısığış hestebən.

Rafiğ Cəlilov ım banki həniən co dələdızdə fakton həxədə ıştə tədğiğati dəvom karde barədə bə əhandon məlumat doəşe.