Milli Məclisədə 2017 -minə sori Devlətə büdcə müzakirə bedə
Az.R Parlamentədə 2017- minə sori Devlətə büdcə müzakirə bino bıə. "Moderator.az" sayt deputat Fərəc Ğuliyevi de im məsələ əlağədar parlamentədə votemoni mətn dərc kardəşe. Ey votəşe ki, jıqo qıley maliyyə behrani vaxtədə hokumət bo İslamə Hənəkon və Formula -1 müsabiğati 317 milyon , bo əvon vərzeşə obyekton inşa karde ro 330 milyon mənot co karde nəzərədə qətedə. Bo 2015-minə sori Avropa Hənəkon anədə vərzeşə obyekton dutə bıən. Əlavə həniən jıqo obyekton dute çı lozime?
De çərimə və sanksiyon vasitə 101 milyon mənot bə büdcə mədaxil bənine. Qaspu verqi avjor kardəkəson, şoferon, həmən co şəhrvandon intizamin bıbon, ğanunon danırışton. Bəvədə verqi müfəttişon, polison anədə miğdarədə cərimon bə büdcə çı cür mədaxil bəkarden?
Deputat Ğüdrət Həsənğuliyevən bə "Musavat.com"i hokuməti təşəbbüson barədə ıştə tənğidon votəşe ki, hokuməti daxilədə qaspuən kənoə ğıvvon təsiri nəticədə jıqo ğəraron ğəbul kardedən ki, ım ğəraron vəziyyəti həniən qıvonin kardedə. Im hərəkəton qıley təxribati nəticən be bəzıne.
Isət Milli Məclisi plenar iclasədə 2 qılə ğanunən hozo kardedən. Taksi şoferon ıştə istqahonku bə kəno sərnişin peqəte qorə 40-50 mənot, vıjoronədə ıştə ıstehsal nıkardə məhsulon havatə fiziki və yuridik şəxson 100 mənotiku tosə 1000 mənoti cərimə bəben. Çimi bənav ictimai vıronədə siqaret kəşəkəson tosə 1000 mənoti cərimə karde barədən qıley ğanun ğəbul kardəşonbe.
Boku hokuməti bardə iğtisadi siyasəti məntiğ jıqoe ki, əv i tərəfədə bə besəmərə layihon de çand 100 milyonon büdcə pulon məsrəf kardedə, diqər tərəfədə əhali orəxnə kopiqi çey dastədə se ro cərimon məbləği həniən ziyod kardedə.
