"Məçiton rıjniə məmləkət bo mısılmonə məmləkəti dust bıe nibəzne"
Oktyabrə manqi 20-ədə İstambul şəhərədə 8 qılə mısılmonə devləti rəhbəron vindemon dəvarde. Az.R prezident İ. Əliyev və Qvineya prezident Alfa Kondeən ım Sammitədə bənə fəxri mehmoni iştirak hestışonbe. Əliyevi əyo ıştə nitğədə bə Ğərəboği munağişə işarə jəşe, votışe ki, Ermənistan məçiton rıjnidə, məçiton rıjniə məmləkət hiç vaxt bo mısəlmonə məmləkəti dust bıe nibəzne.
Meydan TV de Əliyevi ım fikri əlağədar çey hakimiyyəti vaxtonədə rıjniə, dəbastə bıə məçit və dini mərkəzon barədə məğalə bə əhandon təğdim kardəşe. Im sayt bə cəmiyyəti yod dənodə ki, 2009 -minə sori Yasamalədə "Peyğəmbər"i məçit, Natə Sığonədə məçit, 2010 -minə sori Tojə Qunəşli ğəsəbədə "Fatimeyi-Zəhra" məçit, 2016-minə sori Bokuədə "Mirəliəkbər" məçit, 2017 -minə sori Sovetski məhəllədə "Hacı Əbdurrəhimbəy" və "Hacı Cavad" məçiton, yəni 6 qılə məçit rıjnəşone.
2004-minə sori "İçərişəhər" və "Cumə" məçiton, 2008-minə sori "Əbu Bəkr" məçit, 2009- minə sori Bokuədə "Şəhidon" cameə, Qəncədə Şahsevənon Cumə məçit, Abşeroni Mehdiabad ğəsəbə məçit, 2011-minə sori Muşfiğabad ğəsəbə məçit, 2012- minə sori Yasamal rayonədə "Huseyniyyə" məçit dəbastışone.
2010 -minə sori kinon de hicabi bə məktəb şe ğədəğən kardışone. Bımi etiraz kardəkəsonədə bə 100 nəfəri divon qətışone, 2 nəfər kıştışone. 2015-minə sori məhərrəmə manqədə bə Nardarani dindaron əleyh terror təşkil kardışone, 6 nəfər kıştışone, 200 nəfər dəstqir kardışone, cəvonədə 2 qrupi məhkəmə hələən dəvom hestışe.
Mısılmonə məmləkəti duston sıxanədə ne, əmədə zınə bedən.
