Polisi Nardarani şəhidi zoə dəstqir kardəşe
Nardaranıj Huseynağa Bunyadovi 19 sınn hestışe. Çey pıə Rəfael Bunyadov 2015-minə sori Nardarani faciədə şəhid bıə. Dışanbə ruji polison omən Nardaranədə əv çəvon kəy vədə dəstqir kardəşone bardəşone. Sabunçi rayoni məhkəmə əvış de bə polisi muğavimət ittihami 30 sutkə zindonə cəzo məhkum kardə.
Huseynağa ğohomon bə Azadi Radio votəşone ki, " bə polisi muğavimət vonəy. Ey 2-3 ruj bə nav Nardarani 4 nəfər şəhidi ğəbon foto-şəkilon "Feyzbuk"ədə pevolo kardəşbe. Bı əməli qorə əvşon bə zindon dənoe". Əvon həmən ğeyd kardəşone ki, "polison çey pıə və amu kıştəşone, qıley amuən de qolulə jəşone iflic kardəşone, ısətən ım əğıli bə zindon dənodən". Əlavən vote lozime ki, 2 sor bə nav hokuməti həmonə 4 nəfəri Nardarani ğəbıstonədə dəfn karde imkan doəş nıbe. Diy kənoədə, qıley daştədə doşe dəfn karde. Ponə sori çəvon ğəbi sığon rıjnişe. Isətən hətto çəvon ğəbi şəkilon pevolo ğədəğən kardedə. De ım roy çəvon məhəbbəti çe xalqi dılo bekarde cəhd nişon dodə.
Hokuməti bə dindaron əleyh siyasət de ımi orəxedəni. Vəkil Yalçın İmanov ki, de dini və siyasi məhbuson huğuğon mudafiə məşğul bıe, çe Vəkilon Kolleqiyaku xaric kardışe. Demiən bə çey vəkiləti fəaliyyəti xitam doşe. Respublika Penitisiar Xidməti rəhbəriyyəti de jiqo xahişi bə ım Kolleqiya muraciət vığandəşbe. İmanovi bə Azadi Radio votəşe ki, bə dini məhbus Abbas Huseynovi Ğobustani zindonədə doə işqəncon, ey bə çarmex kəşe fakti bə cəmiyyəti faş karde bəpeştə bəmı xəbə rosnidəbin ki, hokuməti petonə mərtəbədə çımı barədə tədbir vinde məğsəd hestışone. Bı səbəbən mıni çe Kolleqiyaku xaric karde az bəçəşbim.
