Hokuməti Yalçın İmanovış boçi vəkilətiku xaric karde

Boku hokuməti azad vəkilon səpe həmlə karde nəinki Respublika, həmən dınyo ictimaiyyəti nəzər cəlb kardəşe. Noyabri 20-ədə Vəkilon Kolleqiya Yalcın İmanovış çe ım təşkilati uzvyətiku xaric karde, demiən bə çey vəkiləti fəaliyyəti xitam doe əlağədar Vəkilon Beynəlxalqə Assosasiya Bəşəri Huğuğon İnstitut ıştə bəyanatadə Əliyevi hokumət dəvət kardışe ki, İmanovi vəkiləti səlahiyyəti bərpa bıko.

Çe Avropa Şura bə bəşəri huğuğon dair komissar Nils Muyjinieksi bə İmanovı vəkiləti fəaliyyəti xitam doeku ıştə norohəti ifadə kardışe, votışe ki, İmanovi bənə vəkili bəşəri huğuğon mudafiədə fəal iştirak hestışe.

 "Azadlıq.info" sayt çe muxalifəti lideronədə Cəmil Həsənli və Əli Kərimli bə Yalçın İmanovi  bənə əğidəmandə, vicdaninə, həmən ıştə koy zınə peşəkarə vəkili ğıymət doe barədə nıvıştışe. Əvon votəşone ki, Yalçıni ıştə vəzifə deni de vicdani icra karde, bə hokuməti dəsturon tabe nıbe, ıştə mudafiə kardə məhbuson huğuğon çe hokuməti məmuron ıştənbəsə, ğeyri-ğanuniə hərəkətonku mudafiə karde, çəvon jıqo murtəce əməlon bə dınyo cəmiyyəti nəzə rosnie səbəbiku, hokuməti çeyku ğisas seşe, əvış ce məhkəmə-mudafiə sistemiku diəro karde.

Yalçın İmanov dini məhbusonədə Taleh Bağırzadə, Mevsum Səmədovi, Abbas Huseynovi və həniən diqər dini və siyasi məhbuson huğuğon mudafiə kardəşe. Ey  bə Azadi Radio votəşe ki, əv hokuməti bey munasibətədə jiıo qıley qəm şodoe çəş kardedəbe. "Qıley təəssufım ıme ki, bəştə mudafiə kardə məhbuson xudahafizi vote imkanım nıbe. Əvon çımı dustonin. İnşaallah, azadiədə dəvon didor bəkardemon".

Noyabri 22-ədə Ali Məhkəmə bə AİP sədr məhbus Mevsum Səmədovi kassasiya şikayəti diə kardənin bıe. Əmo bə çey vəkili Yalşın İmanovi fəaliyyəti  xitam doe səbəbiku məhkəmə bə dekabri 6-minə ruj ovıştınişone. Bə Səmədovi odəmon votışone ki, bo eyo tojə vəkil peydo bıkon.