Polisi qıley dini fəalşən dəstqir kardə

Noyabri 26-ədə, Nardarani faciə sorəqardışi ruji polisi Mısılmonon İbemonə Hərəkati fəal Emin Əliyev dəstqir kardışe. Əv həmonə ruji Nardarani hadisə nəticədə həlok bıə 4 nəfər şəhidi ğəbi ziyarət karde piəşe. Im ğəbon nezi polisi post onoəşe.

Çə posti polison bə çey ziyarəti imkan doəşon ni, dəstqir kardəşone, bardəşone bə polisə şebə. Sabunci rayoni məhkəmə Emin de bə polisi muğavimət və ictimai asayişi darışte ittihami bə 30 sutkə zindonə cəzo məhkum kardəşe. Bı barədə  bə Azadi Radio Emin Əliyevi əvlodon məlumat doəşone.

Nardarani hadisə məhbusonədə Elçin Ğasımov və 11 nəfər həmməsləkon məhkəmən 11 manqe ki, Boku Qonə Cinayəton Məhkəmədə dəvomış heste. Noyabri 24 -minə ruji iclasədə məhbus Əmirəli Əliyev çe vəkil Aytən Əliyevaku noroziəti kardəşe, votəşe ki, " ım xanım çe hokuməti tərəfo çımı vəkil təyin kardəşone, əmo ey tosə ısət bomı vəkiləti kardəşni." Hakimiku xahiş kardəşe ki, ıştə vəzifə deni icra nıkarde səbəbiku çey barədə bə Vəkilon Kolleqiya şikayət məktubi bıvğando. Məhbus Elqun Axundov polison çey kədə peqətə 20 həzo mənot puli, Ağaəli Yəhyayev isə  çey avtomobili oqırdınie barədə vəsadət ros kardəşone. Hakimiən votəşe ki, bı məsələon ce məhkəmə orəxnə yekun iclasədə diə bəkardemon.

"Azadlıq.info"ən xəbə dodə ki, 6 numrəninə zindonə muəssisə rəhbəriyyət çe məhbuson har kəsiku 20 mənot elektrikə pul tələb kardedə. Çəvon ailə uzvon bımi etiraz kardedən, votedən ki, "ıştə zindonədə bıə məhbuson hardəy əmə dodəmon, çunki əyo çəvon ğida təminat vey bərbad vəziyyətəde. Isətən bərği puli çəməku tələb kardedən. Bəs ə vəzifədaron ki, bəpe bımon nəzarət bıkon, de çiçi məşğulin"?