Vəhədənə sori hokumət məvacib və pensiyon çanədə ziyod bəkarde

2018-minə sori budcə Az.R cəmiyyətədə muzakirə bedə. "Maidə.az" bə "Musavat.com" sayti istinadən nıvıştedə ki, vəhədənə sori budcədə məvacib, pensiya və jimonə minimumi məbləğ , diqər sosial tədbiron - bə əlilon, şəhidə ailon muavinəton tədricən ziyod karde nəzərədə qətə bedə.

Çe iğtisadşunas ekspert Natiğ Cəfərli fikir jıqoe ki, imsor məmləkətədə infilyasiya səviyyə rəsmən 13,8% elan bıə. Əmo dəğiğ zınə bedə ki, hokumət məvacib və pensiyon ım ğədər indeksasiya nibəkarde, çunki tojə sori budcədə bımi ro anədə vəsait nəzərədə qətə bıəni. Əqər nati ğıymət boho bıbo, həmən 2018-minə sor prezidentə entexabati sor be səbəbiku, mayə manqədə bə budcə de ım məğsədi əlavə vəsaiton daxıl karde mumkune.

Digər ekspert Rəşad Həsənovən çe hokuməti sosial siyasətədə musbət inkişafi ehtimal kardedəni.  2018-minə sori budcədə bo məvacibon indeksasiya 2,5% peros nəzərədə qətə bedə ki, ımən cəmi 104 milyon mənot təşkil kardedə. Əqər devlətə təşkilatonədə muhummə ixtisaron nıbon, məvacibon ziyod karde çətin ki, mumkun bıbo. Mayə manqədə bə budcə sənibəton diə kardedədə əlavə vəsaiton daxil karde imkan yole. Çunki budcədə nati ğıymət 45 dollar nəzərədə qətə bıə. Əqər çey ğıymət 55-60 dollari səviyyədə bımando, hokumət mumkune ki, əlavə mənfəəti bo pensiya və məvacibon indeksasiya karde səbəro bıko.