Hokumət ĞMİ səlahiyyət həniən məhdud kardışe

Prezident İlham Əliyevi fərman doəşe ki, "Mənəvi Molyəton Təbliğatə Fond" soxtə bıbo. Im fond bə Dini Təşkilaton dair Devlətə Komitə tabe bəbe. 100 həzo mənot məbləğədə maliyyəş bəbe, bə məciti rəhbəron məvacib bədo.

Naziron Kabineti bo ım fondi 15 nəfərədə ibarət ştat təsdiğ kardəşe. Bə ey hevujə səlahiyyəton doəşe. Məçiton, dini abidəon inşa və təmir, bə dini təşkilat və icmaon fəaliyyəti dastəq, dini təhsil muəssison maddi-texniki təminat, bə dini təhsil səkəson maddi komək, çəvon sosial mudafiə bə çey səlahiyyəti dairə daxil sahonin.

Eksperton fikir jıqoe ki, Prezidenti ım fondi soxteədə məğsədış Turkiyədə mevcud dini İdarə modeli bə Az.R tətbiğ kardeye. "Musavat.com" nıvıştedə ki, məmləkətədə 1500 məçit fəaliyyət nişon dodə. Bə çəvon niməy rəsmən imom təyin kardəşone. Nezə vaxtonədə bə əmandənə ğismiən təyinaton bəben. Bə çəvon koəkon devləti tərəfo məvacib co bəkarden. Demiən məciti imomon bənə devləti həmkaron fəaliyyət nişon bədon.

Im məsələ qıley cəhətən çımədə ibarəte ki, əv Ğəfğazi Mısılmonon İdarə bə formal qıley təsisat peqordınidə. Çey səlahiyyəton xeyli hissə dastoş sedə. Faktiki məmləkəti məçiton ısət təmom çe Im idarə dasto səşone bə Devlətə Komitə səlahiyyəti ji dənoəşone.

Hələ ki, Şeyxulislam Allahşukur Paşazadə bı məsələ ıştə munasibət bəyon kardə nişe. Jıqo çidə ki, əv ıştənən de ım qardışi rozie.