MM-i ictimai vıronədə siğaret kəşe ğədəğən kardışe

Az.R Parlamenti "Təməku məmulaton istifadə məhdud karde həxədə" ğanun ğəbul kardəşe. Bə ım ğanuni əsasən, təhsil tərbiyə muəssison əraziədə, idarə təşkilaton, vərzeşə və kutləvi tədbiron dəvuniə zalonədə, restoran, kafe və diqər ictimai-iaşə obyektonədə, ticarət və sosial xidmət muəsisonədə, teatr, kino, kitobxonə, sirk, numayişqoh və muzeyonədə, nəğliyyat vasitonədə təməku məmulaton, ğəlyon və elektron siqareton kəşe ğədəğən bedə.

Bımi ro muəssisonədə bəpe əleydə sərpuşə məkon co kardə bıbo. Jıqo imkan nıbə vıronədə ojə həvoədə təməkuə məmulatonku istifadə karde icazə doə bedə. "Qafqazinfo" ım ğanuni ğəbil bıe həxədə xəbə nıvıştəşe, əmo bey əməl nıkardəkəson çanədə cərimə karde barədə məlumat doə nişe.

Milli Məclisi bə "Devlətə rusumon həxədə" ğanuniən kardə əvəzon nəticədə pasport və şəxsiyyətə vəsiğon devlətə rusumi məbləğən xeyli ziyod bıə.

Naziron Kabineti bə məmləkət idxal bıə avtomaşinon kemruqə rusum 70 %, bə alkaqolə peşoməyon və siqareton aksizə rusum 100% pos kardəşe. Şodmonə sarayon, kafe və restoranon mahne handovnie səbəbiku har manq bə budcə 50-60 mənot qanorarə pul avjor kardənin bəben. Hokumət de ım roy 2018-minə sori budcə defisiti çe arə barde fikir hestışe. Əmo ey jıqo maliyyə behranə vəziyyətədə tojə sori budcədə bə dəvardə sori nisbətədə bo hərbi xarcon 1 milyard mənot vey vəsait nəzərədə qətəşe. Deputat Vahid Əhmədovi votəşe ki, hərbi strukturonədə maliyyə vəziyyəti Hisobkardə Palata təftiş kardənine. Əmo tosə ısət hiç bə ni ki, ım palata hərbiədə jıqo qıley audit dəvunio. Ey ğeyd kardəşe ki, hərbiə ğıvvonədə bə maliyyə vəsaiti məsrəfi nəzarəti təşkil karde ehtiyac heste.